तीनलकडी पूल लाल फितीत

 म. टा. वृत्तसेवा, इगतपुरी

शहरातील जुना मुंबई-आग्रा महामार्गावरील तीन लकडी पुलावर प्रचंड मोठमोठे खड्डे पडले असून, वेळोवेळी निवेदने देऊन, बैठका घेऊनही सार्वजनिक बांधकाम खात व रेल्वे प्रशासन टाळाटाळ करीत आहे. त्यामुळे संबंधित अधिकाऱ्यांना नागरिकांनी घेराव घालून जाब विचारला. यामुळे तीन लकडी पुलावर काही वेळ तणाव निर्माण झाला होता.

जुन्या मुंबई-आग्रा महामार्गावरील तीनलकडी पूल हा शहराला जोडणारा सर्वात महत्त्वाचा पूल असून, यावरून रोज दहा हजार नागरिकांचा विद्यार्थ्यांचा आणि शेकडो चारचाकी वाहनांचा राबता असतो. या पुलाखाली रेल्वेमार्ग असून रोज जवळपास शेकडो रेल्वे आणि मालगाड्या या मार्गावर धावत असतात. गत वर्षी शहरातील महिंद्रा कंपनी ते बोरटेंभेपर्यंत जवळपास १४ कोटी रुपये खर्च करुन सीमेंट काँक्रीटीकरण व डांबरीकरण करण्यात आले. मात्र या महामार्गावरील तीनलकडी पुलाची दुरुस्तीबाबत बांधकाम खात्याने टाळल्याने नागरिकांमधे संभ्रम निर्माण झाला होता. दरम्यान, या पुलावर मोठमोठे खड्डे पडल्याने ते दुरुस्त करावे, अशी मागणी पावसाळा सुरू होण्यापूर्वीपासून नागरिकांची आणि सामाजिक कार्यकर्त्यांची होती.

मात्र, या अनेक वर्षांपासून पुलाची डागडुजी करणाऱ्या सार्वजनिक बांधकाम खात्याने हे काम करण्यास नकार दिल्याने नागरिकांमध्ये संताप व्यक्त होत आहे. दरम्यान, वसीम सय्यद यांनी संबंधित बांधकाम विभागाचे उपअभियंता विलास आव्हाड यांना प्रत्यक्ष पुलावर नेऊन तेथी बिकट परिस्थिती दाखवली. यावेळी रहदारी करणाऱ्या नागरिकांनी गर्दी केली होती. नागरिकांनी आव्हाड यांना घेराव घातल्याने आव्हाड यांची चांगलीच धांदल उडाली.