सटाण्यात अवैध गर्भपात; डॉक्टरसह नर्स अखेर अटकेत

सटाणा : येथील ग्रामीण रुग्णालयात अल्पवयीन गर्भवतीचा बेकायदेशीरपणे गर्भपात केल्याप्रकरणी कंत्राटी तत्वावरील स्त्रीरोगतज्ज्ञ डॉ. सुचिता बच्छाव व अधिपरिचारिका कामिनी आत्माराम कोर यांना मंगळवारी पोलिसांनी अटक केली. या दोघींना न्यायालयीन कोठडी सुनावली असून, नाशिक जिल्हा कारागृहात त्यांची रवानगी करण्यात आली आहे. जिल्हा शल्य चिकित्सक डॉ. अशोक थोरात यांच्या पत्रावरुन सटाणा पोलिसांत गुन्हा दाखल करण्यात आला आहे. दरम्यान, या अटकेमुळे वैद्यकीय क्षेत्रात एकच खळबळ उडाली आहे.

एक सप्टेंबर रोजी घडला होता प्रकार

तरुणीवर अत्याचार करणारा तरुण अटकेत

पोस्को कायद्यांतर्गत गुन्हा दाखल

वैद्यकीय क्षेत्रात खळबळ

याबाबत सविस्तर वृत्त असे की, तालुक्यातील एका खेडेगावातील १७ वर्षीय अल्पवयीन मुलीचा १ सप्टेंबर २०२२च्या रात्री सटाणा ग्रामीण रुग्णालयात बेकायदेशीरपणे गर्भपात केल्याचा प्रकार उघडकीस आला होता. यावेळी रात्री कर्तव्यावर असलेल्या इतर डॉक्टरांनी पोलिसांना माहिती दिल्यानंतर रात्री उशिरा पोलिसांनी रुग्णालयातून गर्भपातासाठी वापरलेल्या गोळ्या व साहित्य जप्त केले होते. या प्रकरणी पोलिसांनी पोस्को कायद्यातंर्गत या मुलीवर अत्याचार करणाऱ्या कोळीपाडा येथील एका विवाहित तरुणास अटक केली होती. दरम्यान, जिल्हा शल्यचिकित्सकांनी संबंधित स्त्रीरोगतज्ज्ञ डॉ. सुचिता बच्छाव, अधिपरिचारीका कामिनी कोर यांना निलंबीत केले होते. पोलिसांनी दोघांविरुद्ध गुन्हा दाखल करून अटक केली आहे.