पोलिस स्टेशनजवळील दुकानातच सापडले घबाड; अंबडला साडेतीन लाखांचा अवैध गुटखा जप्त

सिडको : राज्यात अवैध गुटखाविक्रीला बंदी असतानाही शहरात राजरोसपणे गुटखा विक्रीचा व्यवसाय सुरू असल्याचा प्रकार समोर आला आहे. अंबड पोलिस स्टेशनच्या शंभर मीटर अंतरावरच एका होलसेल गुटखा व्यावसायिकाकडून तब्बल साडेतीन लाखांचा अवैध गुटखा अंबड पोलिसांनी कोम्बिंग ऑपरेशनच्या कारवाईदरम्यान जप्त केला आहे.

वाढती गुन्हेगारी व शहरात राजरोसपणे अवैध धंदे सुरू असल्याने पोलिस आयुक्त अंकुश शिंदे यांनी कारवाईचे आदेश दिले आहेत. यानुसार मंगळवारी (दि. ७) रात्री अंबड पोलिसांकडून हद्दीत कोम्बिंग ऑपरेशन सुरू होते. गुन्हेगारांची पडताळणी सुरू असताना अंबड पोलिस ठाण्याचे पोलिस उपनिरीक्षक सुनील बिडकर यांना एका गोडाऊनमध्ये गुटखा ठेवला असल्याची गोपनीय माहिती मिळाली.

यानुसार अंबड पोलिस ठाण्याच्या मागे शंभर मीटर अंतरावर मुसळे ट्रेडर्स या होलसेल गुटखा व्यावसायिकाच्या घराच्या बाजूला असलेल्या गोडाउनमध्ये दहा पोते विमल पानमसाला, तसेच रजनीगंधा, जर्दा असलेला गुटखा आढळून आला.अंबड पोलिस ठाण्याचे प्रभारी पोलिस निरीक्षक युवराज पत्की यांच्या मार्गदर्शनाखाली गुन्हेशोध पथकाचे सहाय्यक पोलिस निरीक्षक वसंत खतेले, पोलिस उपनिरीक्षक सुनील बिडकर, हरिसिंग पावरा, उत्तम सोनवणे यांच्यासह अधिकारी व अंमलदारांनी ही कारवाई केली.

अन्न-औषध प्रशासनाचे दुर्लक्ष

अन्न व औषध प्रशासनाकडून अनेक ठिकाणी अवैध गुटखा विक्रेत्यांवर कारवाई करण्यात आली आहे. मात्र, नाशिक शहरात, तसेच सिडको परिसरातील सर्वात मोठा होलसेल गुटखा विक्रीचा व्यवसाय करणाऱ्या मुसळे ट्रेडर्स या दुकानात अद्याप अन्न व औषध प्रशासनाकडून कोणत्याही प्रकारची कारवाई करण्यात आलेली नाही. त्यामुळे यामागे काही ‘अर्थ’पूर्ण संबंध आहेत का, असा प्रश्न नागरिकांकडून उपस्थित केला जात आहे. दोन दिवसांपूर्वीच प्रभारी पोलिस निरीक्षक युवराज पत्की यांनी ठाण्याची सूत्रे हाती घेतल्यानंतर प्रथमच या गुटखा व्यावसायिकावर कारवाई केली आहे. तिचे नागरिकांकडून स्वागत करण्यात येत आहे.