शाळेत जपानी भाषा केंद्रास सुरुवात; शहरातील पहिलाच प्रयोग
...
jitendra.tarte@timesgroup.com/ Twitter : jitendratarte@MT
नाशिक : उगवत्या सूर्याचा देश म्हणून परिचय असणाऱ्या जपानच्या भाषेतील शब्द लवकरच आपल्या घरातील मुलांच्या तोंडूनही बाहेर पडले, तर आश्चर्य वाटायला नको. 'कोन्निचिवा' म्हणजे 'शुभ दिवस' किंवा 'सायोनारा' म्हणजे 'निरोपाचे शब्द' हे लवकरच शहरातील मराठी मुलांच्या जिव्हेवर रूळणार आहेत. याला निमित्त आहे ते मराठी संस्थांकडून चालविण्यात येणाऱ्या शाळांमध्ये रूजणाऱ्या परकीय भाषांच्या 'ट्रेंड'चे. शहरातील एका जुन्या शाळेत उद्या (दि. २५) जपानी भाषा प्रशिक्षण केंद्रास सुरुवात होत आहे. शालेय स्तरावर जपानी भाषा शिकविण्याचा हा शहरातील पहिलाच प्रयोग आहे.
एकीकडे दररोज वाढणारी टोकाची स्पर्धा आणि दुसरीकडे जागतिकीकरणाचा जोर अशा बदलत्या वातावरणात मराठी संस्थांकडून चालविल्या जाणाऱ्या शाळाही कात टाकत आहेत. नाशिकमध्ये पहिल्यांदाच जापनीज भाषेच्या प्रशिक्षण केंद्राचे उद्घाटन उद्या (दि. २५) शालेय स्तरावर होणार आहे. या केंद्रासाठी नाशिक एज्युकेशन सोसायटीच्या रंगूबाई जुन्नरे हायस्कूलने पुढाकार घेतला आहे. येथे अगोदरपासूनच फ्रेंच भाषेचेही शिक्षण देण्यात येते. लवकरच येथे जर्मन भाषा प्रशिक्षणाचे केंद्रही सुरू करण्याचा संस्थेचा मानस आहे. विद्यार्थ्यांना आकर्षित करण्यासाठी शाळांकडून गेल्या वर्षांमध्ये विविध क्लृप्त्या लढविण्यात येत आहेत. आपापल्या विद्यार्थ्यांना जागतिक स्पर्धेत अग्रेसर ठेवण्यासाठी त्यांची भाषिक कौशल्ये विकसित करणे आणि त्यांना इंग्रजीसोबतच इतरही परकीय भाषांचा परिचय करून देण्याकडे शाळांचा कल आहे.
आजवर उच्च माध्यमिक शालेय स्तरावर हिंदी किंवा संस्कृत या भाषांपैकी एका भाषेचा पर्याय निवडण्याचा पायंडा होता. पण, काही वर्षांमध्ये शहरात बहरलेल्या 'सीबीएसई' आणि 'आयसीएसई' माध्यमाच्या शाळांनी या विषयांना फ्रेंच भाषेचा पर्याय मोठ्या प्रमाणावर उपलब्ध केला. यामुळे काही वर्षांपासून शहरात फ्रेंच शिकणाऱ्या विद्यार्थ्यांची संख्या वाढत असताना, इतर भाषांची विशेष दखल घेतली जात नव्हती. विद्यार्थ्यांची इच्छाशक्ती किंवा तज्ज्ञ प्रशिक्षकांची कमतरता अशी कारणे यासाठी असली तरीही यापाठीशी शिक्षण संस्थांची इच्छाशक्तीही तितकीच महत्त्वाची असल्याचे भाषातज्ज्ञांचे मत आहे. जपानी भाषेचे मराठी किंवा संस्कृतशी असणारे साधर्म्य म्हणजे या भाषेचे व्याकरण संस्कृतशी बऱ्याच अंशी ताळमेळ सांगणारे आहे. यामुळे मराठी विद्यार्थ्यांना ही भाषा शिकताना सुलभता होईल, असा शालेय व्यवस्थापनाचा विश्वास आहे.
..
नाशिक एज्युकेशन सोसायटीच्या रंगूबाई जुन्नरे शाळेच्या वतीने जपानी भाषेचे प्रशिक्षण विद्यार्थ्यांना देण्यात येणार आहे. यासाठी ४० विद्यार्थ्यांनी रूची दर्शविली आहे. शाळेत अगोदरपासूनच फ्रेंच भाषा शिकविली जाते. जपानी भाषा प्रशिक्षणास आता सुरुवात होत आहे. लवकरच जर्मन शिकण्याचीही संधी विद्यार्थ्यांना देऊ. परकीय भाषांचे शिक्षण ही काळाची गरज आहे.
- प्रा. दिलीप फडके, उपाध्यक्ष, नाशिक एज्युकेशन सोसायटी