देवळाली कॅन्टोन्मेंट हॉस्पिटलचा निर्णय
...
म. टा. वृत्तसेवा, देवळाली कॅम्प
देवळाली कॅन्टोन्मेंट हॉस्पिटलला डेडिकेटेड कोविड केअर सेंटर म्हणून मान्यता आहे. यामुळे येथे अन्य रुग्णांवर उपचार करण्यास नकार दिला जात असल्याचा प्रकार घडत असल्याचे महाराष्ट्र टाइम्सने 'इतर उपचारांना नकार' या मथळ्याखाली वृत्त प्रकाशित केले होते. यानंतर देवळाली कॅन्टोन्मेंट बोर्डाकडून येथील कॅन्टोन्मेंट हायस्कूलमध्ये बाह्यरुग्ण विभाग सुरू करण्यात आला आहे.
करोनाचा प्रादुर्भाव वाढत असताना सर्वसामान्य नागरिकांकरिता देवळालीत एकमेव असलेल्या सरकारी हॉस्पिटलला डेडिकेटेड कोविड सेंटर म्हणून मान्यता दिली गेली. यामध्ये करोनाबाधित रुग्णासह अन्य काही नागरिकांना क्वारंटाइन करण्यात आले होते. यामुळे येथे अन्य उपचारांसोबत प्रसूतीसह अन्य अत्यावश्यक सेवा देण्यास नकार दिला जात होता. याबाबत महाराष्ट्र टाइम्सने वृत्त प्रकाशित केले होते. देवळाली परिसरात काही खासगी डॉक्टरांनी उपचार करण्यास बंद केले असताना, नागरिकांना बिटको हॉस्पिटल अथवा महागड्या खासगी दवाखान्यात उपचारासाठी जावे लागत होते. या हॉस्पिटलमध्ये बाहेरील नागरिकांवर उपचार सुरू करण्याबाबत जिल्हाधिकाऱ्यांनी दिलेल्या निर्देशाप्रमाणे एक खोली नॉन कोविड रुग्ण तपासणी करण्यासाठी सुरू करणे आवश्यक होते. मात्र तशी सुविधा येथे उपलब्ध नव्हती. त्यामुळे मुख्य कार्यकारी अधिकारी अजय कुमार व उपाध्यक्ष भगवान कटारिया यांनी तत्काळ निर्णय घेत कॅन्टोन्मेंट हायस्कूल येथील पाच वर्गांची उपलब्धता करून देत, यामध्ये दोन बाह्यरुग्ण तपासणी खोल्या, औषधालय, केसपेपर केंद्र, प्रथमोपचार केंद्र सुरू केले आहे. यासाठी दोन डॉक्टर, दोननर्स, वॉर्डबॉय असा कर्मचारीवर्ग नेमला असून, सकाळी ९ ते १ व दुपारी ४ ते सायंकाळी ६ यावेळेत बाह्यरुग्ण तपासणी केली जाणार आहे.
...
कॅन्टोन्मेंट शाळेत आवश्यक औषधसाठ्यासह प्राथमिक उपचार केंद्र सुरू केले आहे. नागरिकांनी कॅन्टोन्मेंट हायस्कूलमध्ये सुरू केलेल्या ओपीडीचा लाभ घ्यावा. यामध्ये अॅडमिट, प्रसूतीसारख्या सुविधांसाठी मात्र बिटको हॉस्पिटल येथे व्यवस्था केली आहे.
- भगवान कटारिया, उपाध्यक्ष, कॅन्टोन्मेंट बोर्ड
...
देवळालीतील गोरगरिबांचा विचार करून उपचारासाठी प्राधान्य दिल्याने उपाध्यक्ष कटारिया यांसह मुख्य कार्यकारी अधिकारी यांचे नागरिकांसह छावा संघटनेच्या वतीने जाहीर आभार मानतो. यापुढे सर्वसामान्यांची अशीच काळजी प्रशासनाने घ्यावी.
- राशीद सैय्यद, नागरिक