म. टा. खास प्रतिनिधी, नाशिक
लॉकडाउनच्या काळात गरीब जनतेला आर्थिक संकटातून बाहेर काढण्यासाठी नाशिक महापालिका क्षेत्र रेड झोनमधून ऑरेंज झोनमध्ये टाकण्याचा प्रस्ताव सरकारकडे पाठवावा अशी मागणी महानगर भाजपतर्फे जिल्हाधिकारी सूरज मांढरे, महापालिका आयुक्त राधाकृष्ण गमे यांच्याकडे करण्यात आली आहे.
जिल्ह्यातील मालेगावात रुग्णसंख्या झपाट्याने वाढल्याने नाशिकही रेड झोनमध्ये आले आहे. परंतु, यामुळे लॉकडाउनचे बहुतांश निर्बंध कायम राहण्याची शक्यता आहे. या पार्श्वभूमीवर भाजपने जिल्हाधिकारी, महापालिका आयुक्तांना निवेदन दिले आहे. नाशिक ऑरेंज झोनमध्ये आल्यास उद्योग सुरू होऊन आर्थिक संकटात सापडलेल्या मजुरांना रोजगार मिळेल आणि त्यांना आर्थिक दिलासा मिळेल, अशी मागणी भाजपचे शहराध्यक्ष गिरीश पालवे, महापौर सतीश कुलकर्णी, आमदार राहुल ढिकले, आमदार देवयानी फरांदे व आमदार सीमा हिरे यांनी केली आहे. निवेदनात म्हटल्यानुसार मागणीत केंद्रीय सचिव प्रिती सुदन यांनी काढलेल्या अध्यादेशानुसार जिल्ह्यातील काही विभागांचे वेगवेगळे युनिट करता येतील. त्या अध्यादेशाच्या आधारे नाशिक महापालिका, नाशिक जिल्हा ग्रामीण, मालेगाव महापालिका असे तीन युनिट करून तीनही युनिटमधील करोना बाधितांची वेगवेगळी माहिती राज्य सरकार व केंद्र सरकार यांच्याकडे मांडावी. नाशिक शहरात करोनाबाधितांची संख्या अत्यंत कमी आहे. त्यामुळे नाशिकला ऑरेंज झोनमध्ये घेण्याची शिफारस करावी, अशी विनंती करण्यात आली आहे. लॉकडाउनमुळे गरिबांना आर्थिक संकटाशी सामना करावा लागत आहे. तुलनेने नाशिक शहरात करोनाबाधितांची संख्या अत्यल्प आहे. सुरक्षित वावरासारख्या उपाययोजना आवश्यक ठरवून नाशिकला ऑरेंज झोनमध्ये घेतले जावे. तसे झाले तर आर्थिक संकटाशी झुंज देत असलेल्या बेरोजगारांना काम करण्यास संधी मिळेल. त्यासाठीच्या आवश्यक उपाययोजना राबवाव्यात अशी मागणी पालवे यांनी केली आहे.