म. टा. वृत्तसेवा, नाशिकरोड
नाशिक-पुणे महामार्गावरील शिंदे गावाजवळील टोल नाक्यावर वाहनांच्या लांबच लांब रांगा लागल्या. बहुतेक वाहनांकडे 'फास्टटॅग' नसल्याने आणि रोखीने टोल भरण्यासाठी काउंटर कमी असल्याने सुरुवातीला गोंधळ उघाला. अगोदरच एकच असलेल्या काउंटरची संख्या नंतर सहापर्यंत वाढवावी लागली. 'फास्टटॅग' वाहनांसाठी सहा काउंटर होते.
महामार्गांवर टोल भरण्यासाठी प्रशासनाने 'फास्टटॅग' बंधनकारक केले. मात्र, ज्या वाहन चालकांकडे अद्यापही 'फास्टटॅग' उपलब्ध नाही अशा वाहन चालकांसाठी सर्वच टोल नाक्यांवर एक काउंटर राखीव ठेवण्यात आले होते. रविवारी पहिल्याच दिवशी नाशिक-पुणे महामार्गावरील शिंदे येथील नाशिक सिन्नर टोलवेज लिमिटेड या टोल नाक्यावर 'फास्टटॅग' नसलेल्या वाहनांच्या लांबच लांब रांगा लागल्या, प्रवाशांच्या वेळेचा अपव्यय झाला. संपूर्ण दिवसभर या रांगा कमी झाल्या नाही. सायंकाळी पाच वाजेच्या दरम्यान टोल प्रशासनाने 'फास्टटॅग' नसलेल्या वाहन चालकांसाठी तीन काउंटर खुले केले. परंतु तरीही वाहनांना टोल भरण्यासाठी जास्त वेळ थांबावे लागत होते.
व्यावसायिक वाहनांची अडचण
कमर्शियल व्हेइकल अर्थात व्यावसायिक वाहनांसाठी 'फास्टटॅग' उपलब्ध नसल्याची ओरड या चालकांकडून केली. अवजड वाहने टोल नाक्यावर थांबून होती. प्रशासनाने सर्वच राष्ट्रीयकृत बँकांना 'फास्टटॅग' उपलब्ध करून देण्याचे आदेश नोव्हेंबरमध्ये दिलेले असतांनाही प्रत्यक्षात बहुतेक बँकांचे 'फास्टटॅग' वाहन चालकांना उपलब्ध होऊ शकले नाही. शिंदे येथील टोल नाक्यावर बँकाचे प्रतिनिधी वाहनचालकांना 'फास्टटॅग' उपलब्ध करून देण्यासाठी हजार होते. या ठिकाणी 'फास्टटॅग' घेण्यासाठी वाहन चालकांची मोठी गर्दी उसळली होती. पेट्रोल पंप, बँका याठिकाणीही 'फास्टटॅग' उपलब्ध होऊ शकले नाही.
स्थानिक वाहनचालकांना टोल नाक्यावर सवलतीच्या दारात टोल भरावा लागत होता. मात्र, 'फास्टटॅग'मुळे आता इतर वाहनांना भरावा लागतो त्या दरानेच टोल भरावा लागत आहे. 'फास्टटॅग' उपलब्ध होऊ शकत नसल्याने टोल नाक्यावर जास्त वेळ वाया गेला. योजना चांगली आहे; परंतु त्यासाठीच्या सुविधा नागरिकांसाठी मूबलक प्रमाणात उपलब्ध नसल्याने रविवारी टोल नाक्यावर गैरसोय झाली.
- योगेश गायधनी,
वाहनचालक