जल्लोषपूर्ण वातावरणात स्वातंत्र्यदिन साजरा

म. टा. प्रतिनिधी, नाशिक

भारताचा ७१ वा स्वातंत्र्यदिन शहरासह ‌परिसरात मोठ्या जल्लोषात साजरा करण्यात आला. मुख्य ध्वजारोहण समारंभ विभागीय आयुक्तालयात पालकमंत्री गिरीश महाजन यांच्या उपस्थितीत झाला. यावेळी जिल्हाधिऱ्यांसह सर्व प्रमुख सरकारी अधिकारी उपस्थित होते. महापालिका, पोलिस आयुक्तालय, विविध पोलिस स्टेशन, महापालिकेची विभागीय कार्यालये, सर्व सरकारी, खासगी, जिल्हा परिषदेच्या शाळा, वाचनालये, सार्वजनिक संस्थांमध्ये मान्यवरांच्या हस्ते ध्वजारोहण करण्यात आले.

पोलिसांच्या वतीने नागरिकांमध्ये हेल्मेट जागृतीसाठी शहरातून हेल्मेट रॅलीचे आयोजन करण्यात आले. अनेक सामाजिक संस्थांनी विविध शाळा, गरीब मुलांना भेटवस्तू दिल्या. पर्यावरणमित्र, तसेच या क्षेत्रात काम करणाऱ्या संस्था, गिर्यारोहक संस्थांनी रामशेज, पांडवलेणे, चामरलेणे, अंजनेरी, त्र्यंबकेश्वर यांसह जिल्ह्यातील विविध किल्ल्यांवर मोहिमा काढून किल्ल्यांची स्‍वच्छता केली. वृक्षारोपणाचेही अनेक कार्यक्रम आयोजित करण्यात आले होते.


सुकाणू समिती सदस्य नजरकैदेत

स्वातंत्र्यदिनी पालकमंत्र्यांच्या हस्ते शासकीय ध्वजारोहणास विरोध करणाऱ्या शेतकरी सुकाणू समितीच्या सदस्यांचा प्रशासनाने धसका घेतल्याचे दिसून आले. स्वातंत्र्यदिनी शेतकरी सुकाणू समितीच्या सदस्यांना तब्बल १९ तास पोलिसांच्या नजरकैदेत ठेवल्याने या सदस्यांना स्वातंत्र्यदिनीच ध्वजास मानवंदनेपासून वंचित राहण्याची वेळ आली. स्वातंत्र्यदिनीच नजरकैदेत राहण्याची वेळ आल्याने सरकारची ही हुकुमशाही असल्याचा आरोप समितीचे सदस्य गणेश कदम व कॉ. राजू देसले यांनी केला. विशेष म्हणजे कॉ. राजू देसले यांना तर स्थानिक प्रशासनाने नेहमीप्रमाणे ध्वजारोहणाचे लेखी निमंत्रण आगोदरच दिलेले होते. स्वातंत्र्यदिनी पालकमंत्र्यांच्या हस्ते होणाऱ्या शासकीय ध्वजारोहणास शेतकरी सुकाणू समितीने तीव्र विरोध दर्शविला होता. या पार्श्वभूमीवर खबरदारीचा उपाय म्हणून सोमवारीच (१४) शेतकरी सुकाणू समितीच्या सदस्यांना त्यांच्या निवास्थानीच नजरकैदेत ठेवले होते.