म. टा. खास प्रतिनिधी, नाशिक
अमेरिकन बनावटीची होवेत्झर आणि कोरियन बनावटीची वज्र या दोन तोफांबरोबरच तोफांचे वहन करणारा आधुनिक ट्रक भाऊबीजेच्या मुहूर्तावर संरक्षणमंत्री निर्मला सीतारामन यांनी लष्कराला सुपूर्द केला. येत्या दोन वर्षात आणखी काही तोफा आणि युद्धसामग्री लष्कराला मिळणार असून, त्याद्वारे लष्कर अधिक बलशाली होणार आहे. परिणामी, देशाची सुरक्षा व्यवस्था कणखर होईल, अशी माहिती संरक्षणमंत्र्यांसह लष्करप्रमुख बिपीन रावत यांनी दिली.
देवळाली फायरिंग रेंजमध्ये शुक्रवारी भव्य सोहळा संपन्न झाला. याप्रसंगी संरक्षण राज्यमंत्री डॉ. सुभाष भामरे यांच्यासह संरक्षण क्षेत्रातील विविध मान्यवर उपस्थित होते. यावेळी सीतारामन म्हणाल्या,'तब्बल तीन दशकांनी लष्कराला आधुनिक तोफा मिळाल्या आहेत. लष्कराचे सशक्त होणे म्हणजे देशाच्या सीमा अभेद्य होणे होय. २००६ पासून तोफा खरेदी करण्यासाठी वाटाघाटी केल्या जात होत्या. मात्र, गेल्या सरकारने त्यात कुठलीही गती घेतली नाही. अखेर पंतप्रधान नरेंद्र मोदी यांच्या नेतृत्वात आणि मार्गदर्शनाखाली गेल्या तीन वर्षात आम्ही वेगाने वाटाघाटी केल्या आणि लष्कराला आधुनिक करण्यासाठी करार केला. ७३७ दशलक्ष अमेरिकन डॉलर किंमतीच्या १४५ होवेत्झर तोफा लष्कराला मिळणार आहेत.' यातील १२० तोफा या भारतात तयार केल्या जाणार आहेत. जिथे रस्ते नाहीत आणि समुद्रसपाटीपासून अधिक उंची आहे, अशा ठिकाणी या तोफा देशाच्या सीमा संरक्षित करतील.' असेही त्या म्हणाल्या.
'कोरियन बनावटीची वज्र ही तोफ ४,३६६ कोटी रुपये किंमतीची आहे. सध्या १० तोफा उपलब्ध झाल्या असून, आणखी ९० तोफा भारतात तयार केल्या जाणार आहेत. मेक इन इंडिया अंतर्गत सूक्ष्म, लघु आणि मध्यम उद्योगांना या तोफांच्या निर्मितीत सहभागी करुन घेतले जात आहे,' असे सीतारामन यांनी स्पष्ट केले.
सध्या वज्र या तोफाची जुळणी केवळ भारतात होणार आहे. मात्र त्यानंतर ही तोफ भारतातच निर्माण केली जाईल. त्याचे तंत्रज्ञान आधुनिक आहे. त्यामुळे येत्या काळात भारतामध्ये मोठ्या प्रमाणात रोजगार निर्माण होईल, असे सीतारामन यांनी सांगितले. तर, दर १५ दिवसाला संरक्षणाच्या विविध प्रश्नांवर समितीची बैठक होत असून, सरकार लष्कराला अधिक शक्तीशाली करण्यासाठी ठोस पावले उचलत आहे. येत्या दोन वर्षात धनुषसह आणखी इतरही आधुनिक तोफा लष्कराला मिळणार असल्याचे लष्करप्रमुख रावत यांनी सांगितले. या दोन्ही तोफांचे प्रशिक्षण देण्याचे काम सुरू झाले आहे. या तोफा लवकरच सीमेवर तैनात होतील, असेही ते म्हणाले.
प्रात्यक्षिके सादर
सद्यस्थितीत लष्करात असलेल्या बोफोर्ससह आणखी काही तोफांची प्रात्यक्षिके संरक्षणमंत्र्यांसह मान्यवरांना दाखविण्यात आली. त्यानंतर नवाने रुजू होत असलेल्या होवेत्झर आणि वज्र या दोन तोफा आणि आधुनिक ट्रक यांचे प्रात्यक्षिक दाखविण्यात आले. लक्ष्य अचूक भेदण्यात या तोफा किती सक्षम आहेत हे लष्कराने दाखवून दिले. याप्रसंगी शत्रूच्या गोटात धडकी भरतानाच आपल्या गोटात मात्र ऊर भरुन येईल, अशी कामगिरी या तोफा बजावणार असल्याचे स्पष्ट झाले आहे.
वीर पत्नी-मातांची भेट
समारंभानंतर संरक्षण मंत्री, राज्यमंत्री आणि लष्करप्रमुख यांनी नाशिक जिल्ह्यातील वीर पत्नी आणि मातांची भेट घेतली. त्यांची आस्थेने विचारपूस केली. आपल्या कुटुंबामुळेच देश सुरक्षित आहे, अशी भावना संरक्षणमंत्र्यांनी यावेळी व्यक्त केली.
बोलण्यास नकार
एचएएलकडे २०२० नंतर काम नाही, यासंदर्भातील प्रश्न सीतारामन यांना विचारला असता त्यांनी त्यावर बोलण्यास नकार दिला. आज फक्त मी तोफांच्या कार्यक्रमाला आले आहे, त्यामुळे त्याशी संबंधित प्रश्नच विचारा, असे सीतारामन पत्रकार परिषदेत म्हणाल्या.
गोडसेंचे कौतुक
खासदार हेमंत गोडसे हे अॅक्टिव्ह आहेत. संसदेतही ते प्रश्न उपस्थित करीत असतात, असे सांगत सीतारामन यांनी गोडसे यांचे कौतुक केले. त्यांच्या मतदारसंघात हा कार्यक्रम होत असल्याने विशेष आनंद असल्याचे त्या म्हणाल्या.