असुरक्षितता, अस्वच्छतेचा डेरा

म. टा. वृत्तसेवा, कळवण
कळवण शहरातील मुख्य रस्त्यावर असलेल्या बस स्टँडमध्ये स्वच्छतागृह आहे. तालुक्यातील व अन्य भागातून येणाऱ्या महिलांना त्याचा लाभ होतो. कळवणच्या बसस्थानकाच्या आवारात मोठी अस्वच्छता आहे. सुमारे १० वर्षांच्या वर कालावधी उलटून गेला असला तरी दिवसेंदिवस होणाऱ्या हागणदारीमुक्तीमुळे या स्वच्छता गृहांमध्ये शहराबाहेरील महिलांचा वावर अधिक दिसून येतो.
या ठिकाणी पुरुषांच्या १२ मुतारी, ६ संडास, २ बाथरूम आहेत. तर महिलांना ४ संडास व १ बाथरूम असल्याने थोडीशी नाराजी आहेच. सुलभ इंटरनॅशनल या खासगी सेवेच्या माध्यमातून स्वच्छता गृहांची निगा राखली जात असते. महिलांना ५ रुपयांची किंमत मोजल्यावर याठिकाणी सुविधा उपलब्ध होत असते. स्वछता मोहीम सर्वात आधी बसस्थानकाच्या आवारात राबविण्यात येत असते. मात्र त्यात सातत्य नसल्याने रात्री उशिरापर्यंत या स्वच्छता गृहाजवळ जाणे महिलांना अडचणीचे ठरते. कारण मद्यधुंद व्यक्ती व या स्वच्छता गृहाबाहेरच उघड्यावर लघुशंका करतात. त्यामुळे या भागात दुर्गंधी पसरते. कळवण बसस्थानकाच्या आवारात दुर्गंधी येणे ही नित्याचीच बाब आहे. मात्र, मुबलक पाणी असल्यामुळे महिलांना कुठलीही अडचण ठरत नसल्याचा दावा व्यवस्थापनाने केला आहे.

कळवण बसस्थानकाच्या आवारात दुर्गंधी मोठ्या प्रमाणात दिसून येते. याबाबत प्रशासनाने गांभीर्याने लक्ष दिले पाहिजे. तसेच महिलांच्या स्वछतागृहासाठी महिला कर्मचारीच असावी.
- मीनाक्षी मालपुरे, अध्यक्ष, इनरव्हील क्लब, कळवण

बसस्थानकाच्या आवारातील स्वच्छतागृहाचा वापर बाहेरगावच्या महिलांना मोठ्या प्रमाणात करावा लागतो. स्वच्छता असली तरी दुर्गंधी घालवण्यासाठी प्रयत्न व्हायला हवेत.
- चांदणी चव्हाण, प्रवासी महिला