संशयितास मदतप्रकरणी वरिष्ठांकडून मात्र गुप्तता
म. टा. खास प्रतिनिधी, नाशिक
जादा परतव्याचे आमिष दाखवून कोट्यवधी रुपयांची फसवणूक करण्याच्या गुन्ह्यात अटकेतील संशयितांना यापूर्वी अप्रत्यक्ष मदत करण्याच्या संशयावरून तत्कालीन तपासाधिकारी आणि पोलिस निरीक्षक विजय पन्हाळे यांना निलंबित करण्यात आले आहे. याबाबत वरिष्ठ पोलिस अधिकाऱ्यांकडून गुप्तता बाळगली जात असल्याने पन्हाळेंनी संशयितांना नक्की काय मदत केली, हे अद्याप स्पष्ट होऊ शकलेले नाही.
वेगवेगळ्या कंपन्या सुरू करून त्याद्वारे गुंतवणुकदारांची कोट्यवधी रुपयांची फसवणूक केल्याचे दोन स्वतंत्र गुन्हे अंबड आणि मुंबई नाका पोलिस ठाण्यात दाखल आहेत. या गुन्ह्याची व्याप्ती मोठी असून, हे प्रकरण मागील एक ते दीड वर्षांपूर्वीच पुढे आले होते. आर्थिक गुन्हे शाखेकडे तपासही पोहचला. मात्र, पुढे काहीच झाले नाही. अगदी मागील महिन्यात पोलिस आयुक्त विश्वास नांगरे पाटील यांनी तपासासाठी पुढाकार घेतल्यानंतर तपासासाठी हालचाली सुरू झाल्यात. आर्थिक गुन्हे शाखेने मुख्य सूत्रधार विष्णू भागवतसह त्याचे सात एजंट आणि सर्वात शेवटी भाजपचा पदाधिकारी सुनील आडके याला अटक केली. सध्या हे सर्व संशयित न्यायालयीन कोठडीत आहेत. दरम्यान, या गुन्ह्याचा नव्याने तपास करताना आर्थिक गुन्हे शाखेत कार्यरत असलेले तत्कालीन पोलिस निरीक्षक विजय पन्हाळे यांच्या कार्यपद्धतीबाबत प्रश्न उपस्थित झाले. या प्रकरणी त्यांची खात्यातंर्गत चौकशीही झाली. त्यात समाधानकारक बाजू समोर न आल्याने त्यांच्यावर निलंबनाची कारवाई करण्यात आली. आर्थिक गुन्हे शाखेतून काही महिन्यांपूर्वीच त्यांची सरकारवाडा पोलिस ठाण्यात सहायक निरीक्षकपदी बदली झाली होती.
भाबडचीही चौकशी
सिव्हिल हॉस्पिटलमधील कैदी वॉर्डात उपचार घेणाऱ्या न्यायबंदी भावास भेटण्यासाठी आलेल्या महिलेकडे पैशांची मागणी करीत तिला कुंडी फेकून मारण्याचा प्रयत्न करण्याचा आरोप असलेल्या पोलिस कर्मचारी संदीप भाबड याच्यावरही निलंबनाची कारवाई होऊ शकते. सूत्रांनी दिलेल्या माहितीनुसार रविवारी (दि.१) दुपारी घडलेल्या या घटनेप्रकरणी सध्या चौकशी सुरू आहे. महिलेचा आरोप असला तरी भाबडची बाजू पुढे येणे आवश्यक आहे. भाबडच्या दाव्यानुसार महिलेला कैदी भावास भेटू न दिल्याने हे आरोप झाले आहेत. सूत्रांच्या माहितीनुसार, या प्रकरणाची खात्यातंर्गत चौकशी होऊन निलंबनाचा पुढील निर्णय होऊ शकतो.