बी. आर्किटेक्चरच्या प्रवेश परीक्षेस दीड हजार विद्यार्थी
म. टा. प्रतिनिधी, नाशिक
राष्ट्रीय स्तरावर आयआयटी, एनआयटी यासारख्या नामांकित संस्थांमध्ये प्रवेश देण्यासाठी घेण्यात येणाऱ्या जेईई मेन्स परीक्षेस मंगळवारपासून (दि. ७) सुरुवात होणार आहे. नॅशनल टेस्टिंग एजन्सीतर्फे (एनटीए) या परीक्षेचे आयोजन केले आहे. दरम्यान, 'एनटीए'च्या वतीने बी. आर्किटेक्चर अभ्यासक्रम प्रवेशासाठी सोमवारी प्रवेश परीक्षा घेण्यात आली. वडाळा रोडवरील टीसीएस आयकॉन डिजिटल झोन या परीक्षा केंद्रांवर १५०० विद्यार्थ्यांनी ही प्रवेश परीक्षा दिली. सकाळी व दुपारी अशा दोन सत्रात ही परीक्षा पार पडली.
'एनटीए'तर्फे गेल्या वर्षीप्रमाणे यंदाही जेईई मेन्स ही परीक्षा दोन टप्प्यात घेण्यात येणार आहे. पहिल्या टप्प्यातील परीक्षेला आजपासून (दि. ७) सुरुवात होणार आहे. वडाळा रोडवरील आयकॉन डिजिटल सेंटरमधून ७५० विद्यार्थी, संदीप फाऊंडेशन केंद्रावर ५०० विद्यार्थी, नाशिक टेस्टिंग एजन्सी या केंद्रावर १०० विद्यार्थी तर जेआययटी कॉलेज केंद्रावर १०० असे एकूण १ हजार ४५० विद्यार्थी या परीक्षेसाठी प्रविष्ट झाल्याची माहिती टीसीएस आयकॉन डिजीटल केंद्राचे समन्वयक योगेश मोरे यांनी दिली. सकाळी ९.३० ते दुपारी १२.३० तर दुपारी २.३० ते ५.३० अशा दोन सत्रात ही परीक्षा पार पडणार आहे. पहिल्या टप्प्यातील जेईई मेन्स नऊ जानेवारीपर्यंत होईल. या परीक्षेचा निकाल ३१ जानेवारी रोजी जाहीर होईल. तर जेईईचा मेन्सचा दुसरा टप्पा एप्रिल २०२० मध्ये पार पडणार आहे. दुसऱ्या टप्प्यातील जेईई मेन्स ३ ते ९ एप्रिलदरम्यान होणार आहे. १ फेब्रुवारी ते ७ मार्च २०२० या काळात या परीक्षेसाठी विद्यार्थ्यांना अर्ज करण्याची संधी मिळणार आहे.
यंदा मिळणार अधिक वेळ
जेईई मेन्सच्या प्रश्नपत्रिकेत यंदा एकूण प्रश्नसंख्या कमी करून विद्यार्थ्यांना प्रश्न सोडविण्यासाठी अधिक वेळ दिला जाणार आहे. परिणामी, प्रश्नांच्या काठीण्यस्तरातही बदल होणे शक्य आहे. ऑनलाइन पद्धतीने ही परीक्षा घेण्यात येत आहे. यामध्ये फिजिक्स, केमेस्ट्री आणि मॅथ्स या तीन विषयांवर आधारित परीक्षा आहे.