ऑनलाइन फसवणूक करणारी टोळी जेरबंद
म. टा. खास प्रतिनिधी, नाशिक
ऑनलाइन पद्धतीने पैसे दिल्याचे भासवून ज्वेलर्ससह कपडे दुकानदाराची लाखो रुपयांची फसवणूक करणाऱ्या टोळीला शहर पोलिसांनी अटक केली. त्यांच्या ताब्यातून साडेसात लाखांचे दागिने व कपडे हस्तगत करण्यात आले. खासगी वृत्त वाहिनीच्या प्रतिनिधीने सजगता दाखवल्याने या टोळीचा भांडाफोड झाला.
विशाल राजकुमार निलंगे (२२) आणि हरीष व्यंकट शेट्टी (दोघे. रा. बेंगळुरू, कर्नाटक) अशी पोलिसांनी ताब्यात घेतलेल्या संशयित आरोपींची नावे आहेत. खासगी मराठी वृत्तवाहिनीचे प्रतिनिधी किरण ताजणे वडाळा नाका येथे दुपारी दीड वाजेच्या सुमारास बातमी संकलन करीत असताना या घटनेची वाच्यता झाली. त्यांच्या राज्यस्तरीय वृत्त वाहिनीचा लोगो असलेली कार (केए ०४, एमएन ०३३५) जाताना दिसल्याने त्यांनी ती थांबविण्याचा प्रयत्न केला. मात्र, चालकाने त्याकडे दुर्लक्ष केले. ताजणे यांनी वाहनाचा पाठलाग सुरू केला तसेच घटनेची माहिती कंट्रोल रूमला कळविली. वाहतूक पोलिसांनी लागलीच वेगवेगळ्या ठिकाणी नाकाबंदी लावली. पंचवटीतील नाशिक मार्केट यार्डाजवळ अखेर हे वाहन थांबविण्यात पोलिसांना यश मिळाले. वाहनाची तपासणी केली असता त्यात सोन्याचे दागिने तसेच नवेकोरे महागडे कपडे आढळून आले. पोलिसांनी त्यांची चौकशी केली असता त्यांनी ऑनलाइन फसवणुकीचा उद्योग करीत असल्याची कबुली दिली. या प्रकरणी रात्री उशिरापर्यंत गुन्हा दाखल करण्याचे काम सुरू होते.
फक्त मॅसेजवर फसवणूक
फसवणुकीच्या या प्रकाराबाबत पोलिस आयुक्त विश्वास नांगरे पाटील यांनी सांगितले, की संशयित विशाल निलंगे हा एमबीए मार्केटिंगचे शिक्षण घेतला असून, हरीष रेड्डी हा बीएएसी झाला आहे. दोघांची घरची परिस्थिती अनुकूल आहे. या संशयितांनी मिळून महाराष्ट्रातील लातूर, कर्नाटक, आंध्र प्रदेशसह इतर काही ठिकाणी फसवणूक केली. मोबाइलमध्ये एचडीएफसी बँकेचे अकाउंट दाखविणारी यंत्रणा त्यांच्याकडे होती. याआधारे ते सराफ दुकानामधून खरेदी करायचे. बील देताना पैसे डेबिट झाल्याचा मॅसेज दुकानादाराला दाखवून माल घेऊन पसार व्हायचे. अशा प्रकारे त्यांनी पाच सराफ आणि एका कपड्याच्या दुकानदाराला गंडा घातल्याचे समोर आले आहे. अद्याप चौकशी सुरू असून, त्यानुसार पुढे कार्यवाही केली जाईल.
सजग नागरिक असल्यास गुन्हेगारांना वाव मिळत नाही, हे या घटनेने दाखवून दिले. सर्वसामान्य नागरिक सुद्धा साध्या वेषातील पोलिस असून, प्रत्येकाने कायद्याबाबत तसेच गुन्हेगारी घटनांबाबत सजगता दाखविल्यास गुन्हेगारांना पळता भुई थोडी होईल.
- विश्वास नांगरे पाटील,
पोलिस आयुक्त