म. टा. वृत्तसेवा, सटाणा
गत सप्ताहात झालेल्या दमदार पावसामुळे केळझर व हरणबारी धरण पूर्ण क्षमतेने भरल्याने रविवारी या दोन्ही धरणांचे आमदार दीपिका चव्हाण व माजी आमदार संजय चव्हाण यांच्या हस्ते जलपूजन करण्यात आले. या वेळी सटाणा बागायतदार संघाचे अध्यक्ष झिपरू सोनवणे, सामाजिक कार्यकर्ते किरण सोनवणे, एन. एम. बच्छाव, भास्कर सोनवणे, विष्णू देसले, जनार्दन चव्हाण, अनिल चव्हाण, पंढरीनाथ सोनवणे आदी उपस्थित होते.
पावसाळ्यात गुजरातमध्ये वाहून जाणारे अतिरिक्त पाणी साल्हेर वळण योजना १ व साल्हेर वळण योजना २ मुळे आरम व मोसम खोऱ्यात वळविण्यात यश आले आहे. या योजनामुळे खोऱ्यात ५४ दलघफू अतिरिक्त पाणी येण्यास मदत झाली आहे. आमदार चव्हाण यांनी या पाण्याचे सर्वेक्षण करीत आरम खोऱ्यात हे पाणी वळविण्याची योजना आखली. तसेच साल्हेर वळण योजना २ च्या माध्यमातून मोसम खोऱ्यात पाणी वळविण्याची योजना आखली होती. या योजनेमुळे केळझर व हरणबारी धराणातील पाणीसाठा वाढण्यात मदत होणार आहे.