कुप्रसिध्द खंडवा गजाआड

एअर गनचा धाक दाखवून करायचा लूट; आणखी एकास अटक

म. टा. प्रतिनिधी, नाशिक

नवयुवकांना एकटे गाठून त्यांना एअर गनचा धाक दाखवून लूट करणारा कुप्रसिध्द रिक्षाचालक खंडवा यास सरकारवाडा पोलिसांनी अखेर जेरबंद केले. खंडावाने चार ते पाच गुन्हे केल्याचे प्राथमिक चौकशीत निष्पन्न झाले आहे. दुसरीकडे वृध्द व्यक्तीला लुटणाऱ्या अन्य एका रिक्षाचालकास भद्रकाली पोलिसांनी अहमदनगर जिल्ह्यातील कोपरगाव तालुक्यातून अटक केली.

नीलेश अशोक सोनवणे उर्फ खंडवा असे या संशयिताचे नाव आहे. पोलिसांनी त्याच्याकडून एक एअर गन, दुचाकी, चार मोबाइल फोन असा मुद्देमाल जप्त केला. काही वर्षांपूर्वी त्याला अटक करण्यात आली होती. मागील काही महिन्यांपासून त्याने उपनगर, पंचवटी, म्हसरूळ, आडगाव आदी पोलिस स्टेशन हद्दीत मुलांना लुटल्याच्या घटना घडल्या होत्या. पोलिस त्याच्या मागावर होते. मात्र, यश मिळत नव्हते. सरकारवाडा पोलिस स्टेशनचे वरिष्ठ पोलिस निरीक्षक सीताराम कोल्हे यांच्यासह इतर कर्मचाऱ्यांना खंडवाची पक्की खबर मिळाल्याने त्याला सापळा रचून अटक करण्यात आली.

दरम्यान, भद्रकाली पोलिसांनी आणखी एका रिक्षाचालकास अटक केली. अनिल छबू जाधव (वय २०) असे संशयिताचे नाव असून, तो सिडकोतील हेडगेवार चौकात राहतो. जाधवने ७ ऑगस्ट रोजी सिडकोतील उत्तमनगर येथे राहणाऱ्या प्रमोद अनंत देशमुख (वय ६६) यांना लुटले होते. घटनेच्या दिवशी नाशिकरोड येथे आपल्या मित्रास भेटण्यासाठी देशमुख गेले होते. रात्री साडेआठ वाजेच्या सुमारास ते शालिमार येथून सिडको येथे जाण्यासाठी ऑटोरिक्षात बसले. संशयित रिक्षाचालकाने वृध्दाच्या हातातील सोन्याची अंगठी हेरून ही लूट केली. देशमुख यांना रिक्षाचालकाने रात्रीच्या वेळी इकडे तिकडे फिरवून बॉईज टाऊन शाळेच्या आवारात नेले. तेथे अंधाराचा फायदा घेऊन वृध्दास धक्काबुक्की करीत त्यांच्या हातातील सोन्याची अंगठी, लिनोव्हा कंपनीचा मोबाइल, मनगटी घड्याळ, ९५० रुपयांची रोकड आणि एटीएम कार्ड असा सुमारे १९ हजार ९५० रुपयांचा ऐवज बळजबरीने काढून घेतला होता. या प्रकरणी भद्रकाली पोलिसात अपहरण आणि लुटमारीचा गुन्हा दाखल करण्यात आला. भद्रकाली गुन्हे शोध पथकाचे उपनिरीक्षक हनुमंत वारे, पोलिस नाईक मोजाड, जाचक, मन्सुरी शेख व कैलास शिंदे आदींच्या पथकाने कोपरगाव येथे लपलेल्या जाधवचा माग काढला. त्याच्या ताब्यातून गुन्ह्यात वापरलेली रिक्षा आणि लुटमारीचा ऐवज हस्तगत करण्यात आला आहे.

अशी करायचा लूट

तुझ्या मित्रासमवेत भांडण झाले, तू चल असे काहीतरी कारण सांगून एकट्या मुलास रिक्षात बसवून एअर गनचा धाक दाखवून त्याच्याकडील पैसे, मोबाइल, तसेच सोन्याचे दागिने काढून घेण्याची मोडस खंडवाची आहे.