म. टा. प्रतिनिधी, नाशिक
सावित्रीबाई फुले पुणे विद्यापीठाच्या वतीने आयोजित 'युवक महोत्सव २०१९'चे प्राथमिक फेरीचे विजेतेपद मविप्रच्या केटीएचएम कॉलेजने पटकाविले. या कामगिरीबद्दल महाविद्यालयास अभिनेते रवींद्र कदम यांच्या हस्ते फिरता चषक प्रदान करण्यात आला. सांघिक विजेतेपदाचा मान केटीएचएम कॉलेजने पटकाविला.
बहारदार, नृत्यविष्कार, लोकगीते, सामाजिक संदेश देणाऱ्या एकांकिका, वाद-विवाद, फोटोग्राफी, वाद्यवादन आदी विविध २५ कला प्रकारांमध्ये सावित्रीबाई फुले, पुणे विद्यापीठाचा युवक महोत्सव २०१९-२० थोरात हॉल तसेच केटीएचएम महाविद्यालय कॅम्पसमध्ये पार पडला होता. या महोत्सवात जिल्ह्यातून ६९५ कलावंत सहभागी झाले. स्पर्धेच्या बक्षीस वितरण समारंभाप्रसंगी सावित्रीबाई फुले, पुणे विद्यापीठ विद्यार्थी विकास मंडळ प्रमुख डॉ. सदानंद भोसले, सुप्रसिद्ध अभिनेते रवींद्र कदम, प्राचार्य डॉ. व्ही. बी गायकवाड, परीक्षक-सुनील देशपांडे (शिल्पकला), भूषण पाटील (नाट्य विभाग), अमोल माळी (संगीत), तुळशीराम दाभाडे (संगीत), हितेश चांगळे (नृत्य), अभिषेक धावडे (शास्त्रीय नृत्य), प्रशांत ठाकरे, स्वप्निल इंगोले (वक्तृत्व), स्वामीराज भिसे (नाट्य), समन्वयक प्रा. टी. सी. पाटील, विद्यार्थी विकास अधिकारी डॉ. गणेश मोगल उपस्थित होते.
कुठल्याही कलेमध्ये यशस्वी होण्यासाठी तुम्हाला जिवाचे रान करावे लागते. कलेची उपासना करताना तुम्हाला सराव करणे खूप महत्त्वाचे आहे. प्रामाणिकतेने व कष्टाने तुमचे व्यक्तिमत्त्व घडेल. विद्यापीठाच्या युवक महोत्सवात खूप सारे कलावंत घडले असून ते विविध क्षेत्रात यशस्वी झालेले आहेत, असे कदम यांनी सांगितले.
मविप्र करंडक २०१४ चा मी विजेता असून, कुठल्याही कलाप्रकारात यशस्वी होण्यासाठी कलास्वरूप देवीची उपासना व मेहनत करावी लागते, तरच आयुष्य सुंदर होते असे परीक्षक प्रा. प्रशांत ठाकरे यांनी यावेळी सांगितले. प्राचार्य डॉ. व्ही. बी. गायकवाड यांनी प्रास्ताविक व प्रमुख अतिथींचा परिचय करून दिला. विविध २५ कला प्रकारांमध्ये केटीएचएम महाविद्यालयाने पारितोषिक प्राप्त केल्यामुळे युवक महोत्सवाचे सांघिक विजेतेपद व फिरता चषक हा प्रमुख अतिथींच्या हस्ते केटीएचएम महाविद्यालयास प्रदान करण्यात आला.