हरसूलच्या कुणाल पवारची रजतला गवसणी
म. टा. प्रतिनिधी, नाशिक
ठाणापाडा (हाळविहीरपाडा) येथील कुणाल पवार या विद्यार्थ्याने आंध्र प्रदेश येथे नुकत्याच झालेल्या नॅशनल स्कूल गेम्स ऑफ आर्चरी स्पर्धेत रजत पदकाला गवसणी घातली. आंध्र प्रदेश येथील कडप्पा येथे स्कूल गेम्स फेडरेशन ऑफ इंडियाने आयोजित केलेल्या १७ वर्षीय वयोगतील ६५ व्या नॅशनल स्कूल गेम्स ऑफ २०१९-२० आर्चरी स्पर्धेत रजत पदक पटकाविले आहे. नाशिकच्या मखमलाबाद येथील छत्रपती शिवाजी महाविद्यालयाचा कुणाल हा विद्यार्थी आहे. या स्पर्धेत भारतीय रिकव्हर आणि कंपाउंड धनुष्य प्रकारातील प्रत्येकी चार मुले, चार मुली अशा २४ खेळाडूंची महाराष्ट्रातून निवड झाली होती. पूर्ण भारतातून या स्पर्धेत ४४ टीमने सहभाग नोंदविला होता.
ग्रामीण भागातील असलेल्या कुणाल पवारची क्रीडा शिक्षक आर. एफ. टर्ले यांनी अंगभूत कौशल्य हेरल्याने व कुणालने आपल्यातील सुप्त गुण, चिकाटी, कौशल्य, कला आत्मसात केल्याने या खेळाच्या प्रकारात कुणाल यास महाराष्ट्र राज्याचे प्रतिनिधित्व करण्याची संधी मिळाली. मार्गदर्शक प्रशिक्षक प्रतीक थेटे, महाराष्ट्र आर्चरी असोसिएशनच्या सरचिटणीस श्रीमती मंगला शिंदे, शिक्षकवृंद कर्मचारी, हरसूल परिसरातुन त्याचे कौतुक होत आहे.