बिबट्याकडून कुत्र्याची शिकार?

म. टा. वृत्तसेवा, पंचवटी

दिंडोरी रोड ते पेठरोड यांना जोडणाऱ्या तारावाला नगर सिग्नलजवळच्या रस्त्यावर रविवारी (दि. २०) बिबट्या दिसल्याची चर्चा होती. मंगळवारी (दि. २२) दुपारी मेरीच्या जलविज्ञान केंद्राच्या आवारात गवतात फाडलेल्या अवस्थेत एक मृत कुत्रा आढळल्याने या कुत्र्याची शिकार बिबट्यानेच केली असल्याचा संशय बळावला आहे. ज्या पद्धतीने कुत्र्याचे शरीर फाडले आहे, ते बिबट्याच करू शकतो, असा अंदाज वन खात्याच्या कर्मचाऱ्यांनी वर्तवला आहे. त्यामुळे मेरी परिसरात घबराट वाढली आहे. या परिसरात पिंजरा लावण्याची मागणी नागरिकांनी केली आहे.

एका दाम्पत्याला बिबट्या दिसल्याची चर्चा रविवारी मेरी परिसरात पसरली. सोशल मीडियाच्या माध्यमातून ही चर्चा काही क्षणात व्हायरल झाली. मात्र, रविवारी रात्री तसेच सोमवारी दिवसभरात बिबट्या कुणाच्याही नजरेस पडला नव्हता. मेरी परिसराच्या काही भागात मोठे वृक्ष, वाढलेले गवत असा भाग असल्याने बिबट्या त्यात शिरला असावा असा अंदाजही अनेकांनी व्यक्त केला. तो अंदाज खरा ठरू लागला आहे. मेरीच्या आवारात गवतात कुत्र्याला फाडलेले दिसल्याची माहिती वन विभागाच्या अधिकारी व कर्मचाऱ्यांना दिल्याने त्यांनी या भागात पाहणी केली. त्या पाहणीत बिबट्या आल्याच्या खुणा आढळल्या. या भागात जास्त सतर्कता बाळगण्याचे मेसेजेस पुन्हा फिरू लागले आहेत. विशेषतः लहान मुले घराबाहेर पडणार नाहीत याची काळजी घेण्यात येऊ लागली आहे.

पिंजराच उपलब्ध नाही

या भागात पिंजरा लावण्यात यावा अशी मागणी येथील नागरिकांनी केली आहे. मात्र, वन विभागाच्या अधिकाऱ्यांनी इतर भागात २६ ठिकाणी पिंजरे लावले असल्याने पिंजराच उपलब्ध नसल्याचे सांगिण्यात आले. त्यामुळे नागरिकांनी संताप व्यक्त केला. दुसऱ्या विभागाकडून पिंजरा उपलब्ध करून तो लावण्यात यावा, अशी मागणी जोर धरू लागली आहे.