मला बोलू द्या - आयुक्त
महासभेत तब्बल आठ तास आयुक्त तुकाराम मुंढे यांनी नगरसेवकांनी केलेले आरोप शांतपणे ऐकले. काही नगरसेवकांनी त्यांच्यावर केलेला आक्रमक हल्लाही त्यांनी शांतपणे ऐकून घेतला. अनेकांनी आपल्या मर्यादा सोडून आयुक्तांवर शेरेबाजी केली. परंतु, मुंढे यांनी ही शेरेबाजी खेळाडू वृत्तीने घेतली. नगरसेवकांनी आपल्यावर केलेल्या आरोपांवर बोलण्याची संधी मिळेल, अशी आशा आयुक्तांना होती. परंतु, आठ तासांच्या चर्चेनंतर महापौरांनी ठरावावर आदेश देण्याची तयारी सुरू करताच, मुंढे यांनी मलाही बोलू द्या, अशी विनंती महापौरांना केली. परंतु, मुंढे बोलायला लागल्यावर थांबणार नाहीत, या भीतीने महापौरांनी त्यांना बोलण्यास नकार दिला. त्यावर माझ्यावर आरोप झालेत, त्यामुळे मला बोलू द्या, असे आर्जव केले. परंतु, महापौरांनी त्यांना बोलण्याची संधी दिली नाही. त्यामुळे आयुक्त नाराज झाले.