म. टा. प्रतिनिधी, नाशिक
बाइकस्वारीचा मनमुक्त आनंद, या उत्साहातही जपलेले समाजभान, वैविध्यपूर्ण पोशाखांवर घेतलेली मेहनत आणि स्त्रीशक्तीचा दिलेला नारा... आनंद साजरा करण्याचा प्रत्येकीचा फंडा वेगळा असला, तरी त्यातील जपली जाणारी एकी मात्र सारखीच. ही मैत्री आणखी वृद्धिंगत होणार असून, जुनी मैत्री जपत नव्याने भेटणाऱ्या सख्यांसोबत बाइकर्णींचा यंदाचाही महिलादिन अधिक खास ठरणार आहे. 'महाराष्ट्र टाइम्स' आयोजित 'ऑल वूमेन पॉवर रॅली'चा थरार रविवारी (दि. १५ मार्च) शहरात रंगणार आहे.
जागतिक महिला दिनानिमित्त 'महाराष्ट्र टाइम्स'तर्फे 'ऑल वूमेन पॉवर रॅली'चे आयोजन करण्यात आले आहे. रविवारी (दि. १५) सकाळी ७ वाजता या बाइक रॅलीस प्रारंभ होणार असून, बाइकर्णींना सकाळी ६.४५ पर्यंत ईदगाह मैदानावर उपस्थित राहायचे आहे. दर वर्षी 'मिळून साऱ्याजणी, चारचौघी, नारीशक्ती जिंदाबाद, आव्वाज कुणाचा' असा उत्साह घेऊन साऱ्या बाइकर्णी रॅलीत सहभागी होतात आणि प्रत्येक क्षणागणिक उत्साहाचा पारा चढाच ठरतो. एक नवा ट्रेण्ड दाखविणाऱ्या या महिलादिन विशेष रॅलीत सख्यांची धम्माल असते. पारंपरिक वेशभूषेशी आधुनिक पोशाखाची सांगड घालत काही जणी जिन्स आणि फेटा यांचे कॉम्बिनेशन करतात.
यंदाही वाऱ्यासंगे डोलण्यासाठी बाइकर्णी सज्ज होत असून, तरुणींपासून महिला मंडळे, ऑफिस महिला ग्रुपसह किटी पार्टी ग्रुपची मोठ्या संख्येने नावनोंदणी केली जातेय. रॅलीतून महिलांच्या सामर्थ्याचे दर्शन घडविण्यासाठी नारीशक्तीचे नवे प्लॅन्स तयार झाले आहेत. यंदाच्या बाइक रॅलीत आपल्या ग्रुपचे हटके सेलिब्रेशन व्हावे, यासाठी पारंपरिकपासून वेस्टर्न आऊटफिटपर्यंतचा ट्रेंड फॉलो केला जाणार आहे. जुन्या मैत्रिणींना सोबत घेऊन रॅलीत सहभागी होत नव्या मैत्रिणींचा ग्रुप तयार करण्यासाठी महिलांचा उत्साह वाढला आहे. धम्माल मस्तीच्या या पर्वणीत वेगावर स्वार होतानाच समाजप्रबोधनासह वेगळे टशन देण्याची संधी महिलांना मिळणार आहे. ही संधी आजमावण्यासाठी आजच तुमचे नाव नोंदवा.
--
जागतिक महिलादिन जल्लोषात साजरा करण्यासाठी हजारो महिला दर वर्षी 'मटा'च्या बाइक रॅलीत रविवारी सकाळी उत्स्फूर्तपणे सहभाग घेतात. नेहमीच्या व्यापातून वेळ काढून नारीशक्तीच्या सन्मानासाठी होणारी एकजूट कौतुकास्पद आहे. या उपक्रमातून महिलांविषयीचा आदर वाढण्यास निश्चितच मदत होते. यासह महिलांचा आत्मसन्मान आणि आत्मविश्वासही वाढतो.
-डॉ. आरती सिंग, पोलिस अधीक्षक, नाशिक ग्रामीण
--
गेट सेट गो...
'ऑल वूमेन पॉवर रॅली'त सहभागी होण्यासाठी नावनोंदणी अनिवार्य आहे. नोंदणी करण्यासाठी www.allwomenpowerrally.com या वेबसाइटला भेट द्यावी. तेथील रजिस्ट्रेशन पर्यायावर क्लिक करून नावनोंदणी करावी. एसएमएसद्वारेही नावनोंदणी करता येईल. त्यासाठी 'PoweRallyNSK' हा मेसेज टाइप करून ५८८८८ या क्रमांकावर पाठवावा. अधिक माहितीसाठी ९४२२५१३५६९ या क्रमांकावर संपर्क साधावा.
- -
कुठे अन् कधी?
कधी : रविवार, दि. १५ मार्च २०२०
वेळ : सकाळी ७ वाजता
कुठे : ईदगाह मैदान, त्र्यंबकरोड, नाशिक