भाजपनं मला तयारी करायला सांगितलंय! नाशकात महंत अनिकेत शास्त्रींची एन्ट्री; तिढा वाढला

नाशिक: महायुतीला नाशिकच्या जागेवरील तिढा अद्याप तरी सोडवता आलेला नाही. शिवसेनेचा खासदार असलेल्या नाशिकवर भाजप आणि राष्ट्रवादी काँग्रेसचा दावा आहे. राष्ट्रवादी काँग्रेसचे नेते आणि मंत्री छगन भुजबळ यांनी नाशिकच्या जागेवरील दावा सोडला आहे. पण राष्ट्रवादीनं या जागेवरील दावा कायम ठेवला आहे. नाशकात आमचीही चांगली ताकद आहे, असं म्हणत भाजपनंही या जागेवर दावा सांगितला आहे. त्यामुळे नाशिकचा पेच कायम आहे.

नाशिकचे विद्यमान खासदार असलेले हेमंत गोडसे पुन्हा उमेदवारी मिळावी यासाठी प्रयत्नशील आहेत. त्यासाठी त्यांनी अनेकदा मुंबईच्या वाऱ्या केल्या. मुख्यमंत्री एकनाथ शिंदे यांच्या भेटीगाठी घेतल्या, त्यांच्याशी चर्चा केल्या. शिंदे यांचे पुत्र श्रीकांत यांनी हेमंत गोडसे यांनी गोडसेंना उमेदवारी जाहीर केली. पण अद्याप तरी पक्षानं अधिकृतपणे त्यांना उमेदवारी जाहीर केलेली नाही. त्यामुळे गोडसेंचं काय होणार हा प्रश्न कायम आहे.
भाजप वापरणार ठाकरे पॅटर्न; शिंदेसेनेला 'सायलेंट' करण्याची तयारी; रिसॉर्टमध्ये रणनीती ठरली?
भाजपनं आपल्याला निवडणुकीची तयारी करण्यास सांगितल्याचं म्हणत महंत अनिकेत शास्त्रींनी नाशिकचा पेच आणखी वाढवला आहे. पक्षश्रेष्ठींशी वेळोवेळी चर्चा झाली. माझे गुरु आणि भाजप खासदार साक्षी महाराज यांच्यासोबतही संवाद झाला. राज्य आणि केंद्रीय पातळीवर सकारात्मक चर्चा झाली असल्यानं येत्या २ दिवसांत उमेदवारी अर्ज दाखल करेन, असं अनिकेत शास्त्री म्हणाले आहेत.
महायुती, महाविकास आघाडीमुळे अजब घडामोड; ठाकरे बंधूंसोबत घडणार विचित्र योगायोग
नाशिकच्या सर्वांगीण विकासासाठी आम्ही कटिबद्ध आहोत. खासदार हेमंत गोडसेंनी नाशिकसाठी चांगलं काम केलं आहे. आता पक्षानं मला संधी दिल्यास मीदेखील नाशिकचा विकास करेन, असं शास्त्री यांनी सांगितलं. महायुतीनं हेमंत गोडसेंना तिकीट दिल्यास त्यांच्या पाठिशी ठामपणे उभे राहू. महायुतीच्या उमेदवाराला आमचा पाठिंबा असेल, असंही त्यांनी स्पष्ट केलं.

मी काल मुंबईत होतो. तिथे अनेकांच्या भेटीगाठी झाल्या. कालच रात्री मी नाशिकमध्ये परतलो. भाजपनं मला निवडणुकीची तयारी करण्याच्या सूचना दिल्या आहेत. त्यामुळे दोन दिवसांत मी उमेदवारी अर्ज भरेन, असं शास्त्री यांनी सांगितलं. शास्त्रींच्या दाव्यामुळे नाशिकमधील पेच आणखी वाढला आहे.