कारच्या चावीने जीव घेतला, नाशिकमधील खुनाचं गूढ उकललं, धागेदोरे मुंबई ते हरियाणापर्यंत

नाशिक : शहरात मागच्या आठवड्यात पाथर्डी फाटा परिसरात एका कंपनी मॅनेजरवर प्राणघातक हल्ला करण्यात आला होता. या हल्ल्यात कंपनी मॅनेजरचा उपचारादरम्यान मृत्यू झाला होता. या प्रकरणी पोलिसात खुनाचा गुन्हा दाखल करण्यात आला होता. या हत्या प्रकरणाचा उलगडा करण्यास पोलिसांना यश आले असून पोलीस तपासात धक्कादायक बाब उघडकीस आली आहे. पोलिसांना केवळ एका पावतीच्या आधारे या खुनाच्या घटनेतील संशयितांपर्यंत पोहोचण्यात यश आले आहे.

मुंबईत एखाद्या व्यक्तीचे अपहरण करून खंडणीची मागणी करीत पैसा कमवण्याच्या उद्देशाने हरियाणामधील दोघे संशयित राज्यात आले होते. त्यांनी अपहरणाचा कट रचला. त्यासाठी कारची आवश्यकता असल्याने त्यांनी नाशिकमधून कार चोरण्याचा निर्णय घेतला व ते थेट पाथर्डी फाटा परिसरात आले.

अंबड येथील रोहिणी कंपनीचे व्यवस्थापक योगेश सुरेश मोगरे नेहमीप्रमाणे आपल्या कारने (एमएच १५ एचवाय ४९५९) गुरुवारी (दि. २३) सायंकाळी ७ वाजताच्या सुमारास नाशिक-आग्रा महामार्गावरील पाथर्डी परिसरात सर्व्हिस रोडने घराच्या दिशेने जात होते. यावेळी मोगरे एका पान टपरीवर सिगारेट ओढण्यासाठी थांबले. यावेळी मोगरे यांना ड्रायव्हर सीटवर बसलेले बघितलेल्या दोघांनी कारची चावी हिसकावून पळ काढण्याचा प्रयत्न केला. परंतु मोगरे आणि दोघा आरोपींमध्ये झटापट झाली. मोगरे कार सोडत नसल्याने एका हल्लेखोराने त्यांच्यावर चाकूने हल्ला केला. तरीही, ते कार सोडत नसल्याने पुन्हा दुसऱ्या हल्लेखोराने त्यांच्यावर चाकू हल्ला केला. त्यात ते गंभीर जखमी झाले. ते गंभीर जखमी होऊन रक्ताच्या थारोळ्यात पडले.

दरम्यान एका रिक्षा चालकाने मोगरे यांना रिक्षात बसवून तात्काळ उपचारासाठी पाथर्डी फाट्यावरील खाजगी रुग्णालया दाखल केले. त्यानंतर त्यांना अशोका मेडिकव्हर हॉस्पिटलमध्ये हलविण्यात आले. उपचार चालू असतानाच शुक्रवारी त्यांचा मृत्यू झाला. मोगरे यांच्यावर हल्ला केल्यानंतर हल्लेखोर दोघे जण त्यांची कार घेऊन मुंबईच्या दिशेने पळून गेले होते. ते कार घेऊन बेलगाव कुन्हे येथे आले. कारमध्ये फक्त १५ लिटर डिझेल असल्याने त्यांनी महामार्गापासून एक किलोमीटर अंतरावर कार सोडून दिली. या परिसरातील जंगलात दोघांनी रात्र काढली. शुक्रवारी दोघे जण ट्रकने नाशिक शहरात आले आणि येथून रेल्वेने ते हरियाणाला गेल्याचे पोलीस तपासात स्पष्ट झाले आहे.

असा लावला पोलिसांनी संशयित आरोपींचा शोध

कंपनी मॅनेजर योगेश मोरे यांची हत्या झाल्यानंतर शहरात खळबळ उडाली होती. तपासासाठी पोलिसांची चार पथके नेमली होती. यावेळी पोलिसांनी तपसाची चक्रे फिरवत पोलिसांनी कंपनी मालक, कर्मचारी, कुटुंबियांची चौकशी केली. मोगरेंच्या घरी बांधकाम सुरु असताना काही झाले होते का, याचीसुद्धा पोलिसांनी चौकशी केली. मात्र, पोलिसांच्या हाती काहीच लागत नव्हते. घटनास्थळाचे सीसीटीव्ही फूटेज नसल्याने आणि कोणताही पुरावा नसल्याने पोलिसांना तपासात अडथळे येत होते. पोलिसांनी घटनास्थळापासून सुमारे २०० ते ४०० मीटर परिसरातील सीसीटीव्ही फूटेजची पाहणी केली. त्यामध्ये दोन जण संशयास्पद दिसून आले होते.

मुलांच्या ट्यूशन टिचरशी प्रेमसंबंध, पण लग्नाचं वचन मोडलं; पुण्यात तरुणीने जीवन संपवलं
ज्या ठिकाणी ही घटना घडली, त्या ठिकाणा जवळील टपरी चालकाने केलेल्या वर्णनानुसार दोघे जण दिसून आले. हल्ल्याच्या घटनेनंतर तीन दिवसांनी पुन्हा घटनास्थळी जाऊन पाहणी केली. त्यावेळी त्यांना ८० मीटरवर एक पिशवी संशयास्पद दिसली. त्याची पाहणी केली असता त्यामध्ये नवीन कपडे व खरेदीची पावती दिसली. ते कपडे मुंबईतील डिकॅथलॉनमध्ये खरेदी केले होते. पावतीची पाहणी केली असता ती अस्पष्ट होती. मात्र, त्यावर मोबाईल क्रमांक होता. त्यातील एक क्रमांक दिसत नव्हता. त्यामुळे पोलिसांनी एका क्रमांकासाठी आधुनिक पद्धतीने तपास केला असता तो मोबाईल क्रमांक मुख्य आरोपीचा असल्याचे समोर आले.


त्याचे लोकेशन मुंबई, नाशिक व हरियाणा दिसून आल्याने पोलिसांचा संशय बळावला. त्यानुसार पोलिसांनी नाशिकरोड रेल्वे स्टेशनसह परिसरातील सीसीटीव्ही फूटेजची पाहणी केली असता आरोपी दिसून आले. शिवाय, आरोपीचे लोकेशन हरियाणा मिळून आले. त्यानुसार पोलीस हरियाणामध्ये गेले. पोलिसांनी एका आरोपीला घरातून अटक केली. दरम्यान, मुख्य आरोपी अजितसिंग लठवाल (रा. चुडाणा, राज्य हरियाणा) हा पळून गेला. तर यातील एका सतरा वर्षीय संशयिताला पोलिसांनी ताब्यात घेतले आहे.