ज्येष्ठ लेखक उत्तम कांबळे यांचे आवाहन
म. टा. प्रतिनिधी, नाशिक
डोळे हा आपल्या शरीरितील सर्वात नाजूक, सुंदर अन् संवेदनशील अवयव आहे. हा अवयव कायम जिवंत राहू शकतो. मरणोत्तरही जिवंत रहायचे असेल तर नेत्रदान करण्याचा संकल्प करा, असे प्रतिपादन ज्येष्ठ लेखक उत्तम कांबळे यांनी केले.
महाराष्ट्र नेत्र तज्ज्ञ संघटनेने २५ ऑगस्ट ते ८ सप्टेंबर या कालावधीत नेत्रदान संकल्प अभियान पंधरवडा घोषित केला आहे. या अंतर्गत सुजय नेत्र सेवा व रायझिंग सन फाउंडेशन यांच्यातर्फे शहरातील वेगवेगळ्या भागात नेत्रदान संकल्प कार्यक्रम झाले. कृषिनगर येथील जॉगिंग ट्रॅक येथील कार्यक्रमात कांबळे बोलत होते. यावेळी डॉ. नानासाहेब खरे, डॉ. सुनिता खरे, डॉ. तुलसीदास आहेर, डॉ. अरुण सातदिवे, डॉ. एस. शेजवळ, डॉ. नरेंद्र तेलरांधे, चंद्रकांत गायकवाड, गौतम खरे, प्रशांत खंडागळे, हर्षल विसपुते, गौतम गायकवाड, हेमलता शिवरे, गंगा गारगुंड, सुजाता सारसर आदी उपस्थित होते.
कांबळे म्हणाले, की नेत्रदानासारखे दान नाही. आपण जगण्याबरोबरच आपल्यानंतर हे जग कोणीतही पहावे ही आशा नेत्रदानातून कायम ठेवतो. त्यामुळे आपण प्रत्येकाने नेत्रदान संकल्प करायला हवा. त्याबद्दल कुटुंबीयांसह मित्र परिवारात जनजागृती करायला हवी.
नऊ ठिकाणी संकल्प उपक्रम
सुजय नेत्र सेवा व रायझिंग सन फाउंडेशनतर्फे आतापर्यंत गोल्फ क्लब, शिखरेवाडी मैदान, इंदिरानगर जॉगिंग ट्रॅक, संभाजी स्टेडियम, तपोवन परिसर, आनंद जॉगिंग ट्रॅक, नाशिकरोड, मनपा शाळा, चामर लेणी, लोखंडे ट्रॅक आदी नऊ ठिकाणी नेत्रदान संकल्प उपक्रम राबिवण्यात आला आहे.