मखमलाबादमधील हुक्का पार्लरवर कारवाई

म. टा. वृत्तसेवा, पंचवटी

मखमलाबाद शिवारात सुरू असलेल्या एका हुक्का पार्लरवर पोलिसांनी मंगळवारी (दि. १२) रात्री छापा टाकला. या कारवाईत ताब्यात घेतलेल्यांमध्ये हॉटेलचालक, हुक्का पार्लर ग्राहक तसेच तरुण-तरुणींचा समावेश आहे. जागामालक फरार असून, यावेळी दोन बालकामगारांची सुटका करण्यात आली. याप्रकरणी म्हसरूळ पोलिस ठाण्यात गुन्हा दाखल करण्यात आला आहे.

मखमलाबाद शिवारातील सुयोजित गार्डनरोडवरील हॉटेल हबीबी येथे अवैधरित्या हुक्का पार्लर सुरू असल्याची माहिती पोलिस उपायुक्त लक्ष्मीकांत पाटील यांना मिळाली. त्यानुसार मंगळवारी (दि. १२) रात्री साडे दहा वाजेच्या सुमारास या ठिकाणी छापा टाकण्यात आला. यावेळी हॉटेलचालक जितेंद्र बिहारीलाल उपाध्याय याच्यासह हुक्का पार्लर ग्राहक सौरभ ज्ञानेश्वर गायकवाड, रितेश गोविंद देव, समीर श्रीकांत बाल, दीपांश प्रवीण गर्ग, अपूर्व राजेश तेंडूलकर, प्रसाद रवींद्र राजपूत, अभिजित मिलिंद पाटील, सौरभ जगन्नाथ डांगे, शेख जुनेद अल्ताफ यांच्यासह दोन २१ वर्षांच्या तरुणींना ताब्यात घेण्यात आले. यावेळी कामावर असलेल्या दोघा बालकामगारांची सुटका करण्यात आली. कारवाईत सहायक पोलिस आयुक्त विजयकुमार चव्हाण, म्हसरूळ ठाण्याचे वरिष्ठ निरीक्षक सुभाषचंद्र देशमुख यांच्यासह महिला पोलिस सहभागी झाले.

जागामालकावरही गुन्हा
कारवाईत हुक्का पार्लर साहित्य व मद्याच्या बाटल्या आदी साहित्य जप्त करण्यात आले आहे. या प्रकरणी जागामालक युवराज माळी (रा. मखमलाबाद) यांच्यावर देखील गुन्हा दाखल करण्यात आला असून, पोलिस त्यांचा शोध घेत आहेत. अशा गुन्ह्यात जागामालकावर कारवाई झाल्याची पहिलीच घटना आहे.

मखमलाबादमधील कारवाईतून जागामालकांना योग्य संदेश गेला आहे. हॉटेल चालकाचा परवाना रद्द करण्यासाठी प्रस्ताव संबंधित विभागास पाठविण्यात येणार आहे. तसेच बालकामगार उपायुक्तांनाही प्रस्ताव देण्यात येणार आहे.
- लक्ष्मीकांत पाटील, पोलिस उपायुक्त