सत्ता द्या, गोमांस बंदी उठवतो: भाजप

मटा ऑनलाइन वृत्त । मालेगाव

तिहेरी तलाक आणि गोमांस विक्रीविरोधात कठोर भूमिका घेणाऱ्या भाजपने मालेगावात मात्र 'वेगळा'च नारा देत महापालिका निवडणुकीतील मतांच्या बेगमीसाठी मुस्लिमांचे लांगूलचालन करायला सुरूवात केली आहे. 'मालेगाव महापालिकेत सत्ता द्या, गोमांसावरील बंदी उठविण्यात येईल,' असं आश्वासन देऊन भाजपनं त्यांच्या मूळ भूमिकेलाच हरताळ फासल्यानं आश्चर्य व्यक्त केलं जात आहे.

मालेगाव महापालिकेचा प्रचार शिगेला पोहचला असून महापालिका ताब्यात ठेवण्यासाठी प्रत्येक राजकीय पक्ष मतदारांना काही ना काही आश्वासने द्यायला सुरूवात केली आहे. भाजपने मात्र या सर्वांवर कडी केली असून पक्षाच्या भूमिकांना हरताळच फासला आहे. मालेगावमधील बहुसंख्य मुस्लीम जनतेचं गोमांस हेच प्रमुख अन्न आहे. त्यामुळेच या भागातील भाजपच्या बहुतांश उमेदवारांनी पक्षाची गोमांस बंदीची भूमिका बासनात गुंडाळली आहे. तसंच, ‘सत्तेत आल्यास गोमांस बंदी उठवू’, असं आश्वासनं येथील भाजपचे उमेदवार देत आहेत.

तिहेरी तलाकही अमान्य

भाजपच्या तिकिटावर लढत असलेल्या शेख अख्तर यांनी तिहेरी तलाक हा मुस्लिमांचा मुलभूत अधिकार असल्याचं म्हटलं आहे. ‘सर्वोच्च न्यायालयाने जरी तिहेरी तलाकविरोधात निकाल दिला तरी, आम्ही तो मान्य करणार नाही,’ असंदेखील अख्तर यांनी म्हटलं आहे.

निवडणूक प्रचार सभेत महाराष्ट्र भाजपचे अल्पसंख्यांक विभागाचे अध्यक्ष जमाल सिद्दीकी यांनी जास्तीत जास्त मुस्लिमांनी भाजपमध्ये सामील होण्यासाठी आवाहन केलं. मात्र, सिद्दीकी बोलत असताना भाजपचे मालदा येथील उमेदवार शेख अख्तर यांनी त्यांचं बोलणं रोखत तोंडी तलाकसंबंधी सर्वोच्च न्यायालयाचा निकाल अमान्य असून, तिहेरी तलाक मूलभूत अधिकार असल्याचं वक्तव्यं केलं. त्यामुळे तिहेरी तलाक आणि गोमांस विरोध या मुद्द्यांवर भाजप सोयीची भूमिका घेत असल्याचं स्पष्ट होत आहे. २०१२ च्या मालेगाव महापालिका निवडणुकीत भाजपला एकही जागा जिंकण्यात यश आलं नव्हतं. त्यामुळे यंदा भाजपने ८४ जागा असलेल्या महापालिकेतील ५६ जागांपैकी २७ जागांवर मुस्लिम उमेदवार दिले आहेत.