'मॅग्नेटिक महाराष्ट्र'मध्ये मालेगावचे ब्रँडिंग

शहरातील नवउद्योजक होणार सहभागी

म. टा. वृत्तसेवा, मालेगाव

मुंबई येथे दि. १८ फेब्रुवारीपासून सुरू होत असलेल्या 'मॅग्नेटिक महाराष्ट्र २०१८ - ग्लोबल इन्व्हेस्टर समिट' अंतर्गत देश-विदेशातील उद्योजकांचा मेळा आयोजित करण्यात येत असून, या समेटअंतर्गत शहरातील तरुण उद्योजक सहभागी झाले आहेत. या मोठ्या स्तरावरील कार्यक्रमात मालेगावच्या ब्रँडिंगला चालना मिळणार आहे.

पंतप्रधान नरेंद्र मोदी, मुख्यमंत्री देवेंद्र फडणवीस यांच्यासह विविध उद्योग क्षेत्रातील मान्यवरांच्या हस्ते रविवारी (दि. १८) मुंबईत या समिटचे उद्घाटन झाले असून, दि १८ ते २३ फेब्रुवारीदरम्यान हे प्रदर्शन आयोजित करण्यात आले आहे. यात सहभागी होण्यासाठी मालेगाव शहरातील उद्योजक जाणार असल्याची माहिती ग्रामविकास राज्यमंत्री दादा भुसे यांनी दिली. या प्रदर्शनात शहरातील उद्योजकांचे चार स्टॉल आहेत. त्यासाठीची तयारी पूर्ण झाली असून, या स्टॉलमध्ये साखर उत्पादनातील एम. बी. शुगर, कापड उद्योगातील एच. पी. टेक्सस्टाइल, केजल, सौर ऊर्जेतील इन्फ्रा सोलर या मालेगावातील उद्योग व उत्पादनाचे स्टॉल आहेत. प्रदर्शनासाठी अजिंक्य भुसे यांच्यासह अरविंद पगार, रविश मारू, मनीष बाहेती, सम्यक लोढा, चिंतन जैन यासह शहरातील तरुण उद्योजक सहभागी झाले आहेत. मालेगाव शहरातील उद्योग व उत्पादनांना देश-विदेशात ओळख मिळावी, या उद्देशाने उद्योजक सहभागी होत आहेत.