मालेगावच्या साहित्यिकांना
विद्यापीठ अभ्यासक्रमात स्थान
डॉ. देवरे, प्रा. सुर्वे यांच्या पुस्तकांचा समावेश
म. टा. वृत्तसेवा, मालेगाव
येथील श्रीमती पुष्पाताई हिरे महिला महाविद्यालयाच्या प्राचार्य डॉ. उज्ज्वला देवरे आणि प्रा. विद्या सुर्वे-बोरसे यांची पुस्तके नांदेड येथील स्वामी रामानंद तीर्थ मराठवाडा विद्यापीठाच्या एम. ए. मराठीच्या अभ्यासक्रमात समाविष्ट करण्यात आली आहेत. मालेगावातील लेखिकांना विद्यापीठ अभ्यासक्रमात स्थान मिळाल्याने मालेगावच्या शिरपेचात मनाचा तुरा रोवला गेला आहे.
महाराष्ट्रातील सर्वच विद्यापीठांमध्ये या शैक्षणिक वर्षापासून नवीन अभ्यासक्रम सुरू होत आहेत. या नव्या अभ्यासक्रमातून विद्यार्थ्यांना सखोल आणि सर्वस्पर्शी ज्ञान देण्याचा प्रयत्न झाला आहे. भाषेचा नवा विचार व्यक्त करणाऱ्या लेखकांना यात संधी मिळाली आहे. नांदेड विद्यापीठाच्या या बदलेल्या अभ्यासक्रमात येथील महिला महाविद्यालयाच्या प्राचार्या डॉ. देवरे यांच्या 'स्त्री व्यक्तिरेखा गोनिदांच्या' या संशोधनाचा संदर्भ ग्रंथ म्हणून समावेश करण्यात आला आहे. 'प्रादेशिक साहित्य' या अभ्यासपत्रिकेसाठी देवरे यांच्या ग्रंथाचा विद्यार्थ्यांना उपयोग होणार आहे. याच महाविद्यालयात मराठी विषयाचे अध्यापन करणाऱ्या भाषांतरकार प्रा. विद्या सुर्वे-बोरसे यांनी अनुवादित केलेला 'होय, तेव्हाही गाणं असेल' हा बर्टोअल्ट ब्रेख्त यांचा कवितासंग्रह 'भाषांतरित साहित्य' या अभ्यासपत्रिकेसाठी पाठ्यपुस्तकात समाविष्ट करण्यात आला आहे. तसेच 'मराठी बालसाहित्य आकलन आणि आस्वाद' हा त्यांचा ग्रंथदेखील 'बालकुमार साहित्य'अंतर्गत निवडण्यात आला आहे. डॉ. देवरे व प्रा. सुर्वे यांच्या पुस्तक निवडीबद्दल संस्थेच्या संचालक मंडळाने त्यांचे अभिनंदन केले आहे.