म. टा. वृत्तसेवा, मालेगाव
शहरातील वेगवेगळ्या भागातील सहा भूसंपादन प्रकरणात पालिकेवर वारंवार जप्तीची नामुष्की ओढवली आहे. शुक्रवारी देखील शहरातील प्रकाश चौधरी यांच्या भूसंपादनप्रकरणी पुन्हा एकदा जप्तीची कारवाई ओढवली. भूसंपादन दाव्यापोटी १२ कोटी ८३ लाख रुपये पालिकेने अदा करावेत, असे आदेश न्यायालयाने दिले आहेत. शुक्रवारी दिवसभर याविषयी चौधरी यांचे वकील व पालिका प्रशासन यांच्यात चर्चा झाली. अखेर सायंकाळी उशिरा याबाबत पालिकेने २ जानेवारीपर्यंतची मुदत मागून घेत जप्तीच्या नामुष्कीला मुदतवाढ मिळवली आहे.
चौधरी यांच्या मालकीचे १ हे २४ आर जमीन भूसंपादन पालिकेकडून झाल्यानंतर या जमिनीचा पूर्ण मोबदला न मिळाल्याने त्यांनी न्यायालयात धाव घेतली होती. न्यायालयाकडून सप्टेबर महिन्यात पालिका आयुक्तांचे वाहन व चल मालमत्ता जप्तीचे आदेश दिले होते. त्यावेळी चौधरी यांना ७५ लाख रुपयांचा चा धनादेश पालिकेकडून अदा करण्यात आल्याने जप्तीची नामुष्की टळली होती. मात्र त्यानंतर देखील उर्वरित रक्कम न मिळाल्याने पालिकेवर शुक्रवारी जप्तीकारवाई करण्यासाठी चौधरी व त्यांचे वकील दाखल झाले होते.
दुपारी ११ वाजता जप्तीसाठी पथक आले असता आयुक्त संगीता धायगुडे यांच्यासमवेत चर्चेअंती सायंकाळी ५ पर्यंत मुदत मागून घेण्यात आली. दरम्यान सायंकाळी उशिरापर्यंत महापौर रशीद शेख, आयुक्त संगीता धायगुडे यांच्यासह चौधरी व त्यांचे वकील यांच्यात बंद दरवाज्याआड चर्चा सुरू होती. पालिकेकडून १२ कोटी ८३ लाखांपैकी २ कोटी ७५ लाख अदा झाले असून, उर्वरित १० कोटींपैकी सहा कोटी देण्यास पालिका प्रशासन राजी होते. मात्र चौधरी यांनी उर्वरित १० कोटी रक्कम पालिकेने अदा करावी यावर ठाम होते. पालिकेची आर्थिक स्थिती नसल्याने ही रक्कम अदा करणे कठीण असल्याचे महापौर रशीद शेख यांनी पत्रकारांना सांगितले. अखेर याप्रकरणी पालिकेने २ जानेवारीपर्यंत मुदत मागून घेतल्याने शुक्रवारची जप्तीची कारवाई पुढे ढकलली गेली आहे.