शेतकऱ्यांसाठी राष्ट्रवादी युवक काँग्रेस रस्त्यावर
म. टा. वृत्तसेवा, मालेगाव
येथील कृषी उत्पन्न बाजार समितीच्या मुंगसे कांदा खरेदी विक्री केंद्रावरील जय भोले ट्रेडर्स कंपनीच्या कांदा व्यापाऱ्याकडून तालुक्यातील कांदा उत्पादक शेतकऱ्यांची फसवणूक झाल्याचा प्रकार डिसेंबर २०१८ मध्ये उघडकीस आला होता. फसवणूक झालेल्या शेतकऱ्यांची थकीत रक्कम अद्याप मिळालेली नसल्याने शेतकऱ्यांना न्याय मिळावा, या प्रमुख मागणीसाठी मालेगाव महानगर राष्ट्रवादी युवक काँग्रेसच्यावतीने शुक्रवारी विनोद चव्हाण व दिनेश ठाकरे यांच्या नेतृत्वाखाली अपर जिल्हाधिकारी कार्यालय प्रवेशद्वारावर घंटानाद आंदोलन करण्यात आले.
आंदोलनात राजेंद्र पवार, रामचंद्र पाटील, रामदास बच्छाव, प्रदीप खैरनार, ज्ञानेश्वर शेवाळे, रमेश खैरनार, बाजीराव केसकर, वाल्मिक कोळपे आदींसह फसवणूक झालेले कांदा उत्पादक शेतकरी, राष्ट्रवादी पदाधिकारी, कार्यकर्ते सहभागी झाले होते. मागण्यांचे निवेदन अपर जिल्हाधिकारी लक्ष्मण राऊत यांना देण्यात आले.
फसवणूक झालेल्या शेतकऱ्यांना पैसे परत मिळावे यासाठी बाजार समिती संचालक व प्रशासनाने हस्तक्षेप करून काही रक्कम शेतकऱ्यांना दिली असली तरी अद्याप पूर्ण रक्कम मिळालेली नाही. शेतकऱ्यांना ३० ते ५० टक्केच रक्कम देऊन पूर्ण रक्कम मिळाल्याच्या पावत्यांवर स्वाक्षऱ्या घेतल्याचा आरोप करण्यात आला. तसेच फसवणूक झालेल्या सुमारे १०० शेतकऱ्यांनी पूर्ण रक्कम न मिळाल्याचे प्रतिज्ञापत्र सहकार उपनिबंधक यांच्याकडे दिले आहे. त्यामुळे येत्या १५ दिवसात याप्रकरणी बाजार समितीने सकारात्मक कारवाई करावी. अन्यथा आंदोलन करण्यात येईल असा इशारा देण्यात आला.