दारू दुकान हल्ल्याप्रकरणी पोलिसांची सावध भूमिका

मळगाव प्रकरणात अद्याप कोणालाही अटक नाही

म. टा. वृत्तसेवा, सटाणा

सटाणा शहरातील हाकेच्या अंतरावर असलेल्या आरमनदी पात्रातील देशी दारू दुकानाचे तोडफोड व हल्ल्याप्रकरणी सुमारे सहा ते सात लाख रुपयांचे नुकसान झाल्याचा प्राथमिक अंदाज व्यक्त करण्यात आला आहे. या घटनेने तालुक्यात खळबळ उडाली असली तरीही सटाणा पोलिसांनी अद्याप कुणालाही अटक केलेली नाही. यामध्ये पोलिस यंत्रणा अत्यंत सावधपणे भूमिका घेऊन यामागील सत्य शोधण्याचा तयारीत आहे. दरम्यान, प्राथमिक चौकशीअंती याप्रकरणी मळगाव येथील स्थानिक पोलिसपाटील चौकशीच्या फेऱ्यात अडकण्याची शक्यता असून, या अनुषंगाने पोलिसांनी चौकशी सुरू केली आहे.

विदेशी दारूचे दुकाने बंद झाल्याकारणाने देशी दारू कडे तळीरामांचा कल वाढला आहे. तसेच दिवसेंदिवस होत असलेल्या गर्दी व दर्दीमुळे देशी दारूचा धंदा तेजीत आल्याने आपल्यालादेखील हप्ता व खंडणी वाढवून मिळावा यासाठी हा सारा प्रकार झाल्याचा प्राथमिक अंदाज व्यक्त करण्यात येत आहे. मळगाव ग्रामपंचायत हद्दीत व सटाणा शहरातील आरमनदी पात्रात असलेले हे देशी दारूचे दुकान एका रात्रीतून उभे राहिलेले नाही. सुमारे १९७४ पासून या देशी दारू दुकानाची स्थापना याच ठिकाणी झाली आहे. यामुळे तब्बल ४० वर्षांपासून देशी दारूची विक्री होत असल्याचा दावा करण्यात येत आहे. मग सध्याच का महिलांना याचा मानसिक त्रास झाला, असा सवालदेखील उपस्थित करण्यात येत आहे.

पोलिसपाटील चौकशीच्या फेऱ्यात?

याठिकाणी असलेले पोलिसपाटील यांनी या साऱ्या प्रकारामागे निश्चितपणे नियोजन व सूत्रबद्धपणे संघर्ष निर्माण करून पोळी भाजण्याचा प्रयत्न केला असल्याची खुली चर्चा आता रंगू लागली आहे. देशी दारू दुकानाचे संचालक यांनीदेखील पोलिसपाटील यांच्याविरुद्ध थेट तक्रार दाखल करून त्यांना रणांगणात घेतले आहे. संबंधित पोलिसपाटील यांच्यावर दोन ते तीनवेळा निलंबनाची कार्यवाही करण्यात आल्याची दबक्या आवाजात चर्चाही आहे. एकूणच याप्रकरणी पोलिसांनी अत्यंत संयमी भूमिका घेऊन या साऱ्या प्रकाराची अत्यंत गोपनीय चौकशी सुरू केली आहे.