...अन् त्याला गवसला हरविलेला ‘सूर’

jitendra.tarte@timesgroup.com

Tweet: jitendratarte@MT

नाशिक : कुठल्याही प्रकारच्या पाणवठ्यावर सूर मारण्यात श्रीकांतचा (नाव बदलले आहे) बालपणापासून हातखंडा. शालेय वयातच तर त्याच्याकडे राष्ट्रीय जलतरण खेळाडू म्हणून बघितले जात होते. पण एके दिवशी त्याने नेहमीच्याच आत्मविश्वासाने सूर मारला अन् त्याची ती उडी अपघातास कारणीभूत ठरली.

प्रशिक्षकांनी घटनेचे गांभीर्य लक्षात घेत त्यावेळी श्रीकांतला दवाखान्यात दाखल केले. उपचार झाल्यानंतर तो काही दिवसात बराही झाला. पण एके दिवशी रुटीन चेकअपसाठी गेला असताना डॉक्टरांच्या तोंडून आलेल्या शब्दांनी त्याच्या पायाखालची वाळूच सरकली. डॉक्टरांच्या रिपोर्टस अनालिसिस नुसार श्रीकांतच्या पोहण्यावर बंधन नव्हते; मात्र पूर्वीच्या चपळाईने तो स्पर्धा म्हणून पोहण्यात उतरू शकण्यास आता असमर्थ होता. पोहणे हे ज्याचे जीवन बनले होते. अशा उमेदीच्या मुलासाठी डॉक्टरांचा हा रिमार्क स्वप्नांना सुरूंग लावणारा होता. यानंतर श्रीकांत एकलकोंडा बनत गेला. त्याच्यात वाढणारी अबोलताही पालकांना धास्तावणारी होती. अभ्यासात त्याने गुण मिळविले पण इतर कुठल्याही गोष्टीत त्याला रस वाटेनासा झाला.

समुपदेशकांची गाठ पडल्यानंतर श्रीकांत अन् त्यांचे अनौपचारिक गप्पांचे सत्र नकळत बहरत गेले. त्यांनी त्याच्या पूर्वायुष्यातील आनंदी आणि स्फूर्ती देणाऱ्या घटनांना हात घालत त्याला बोलते केले. त्या सत्रात तो इतका बोलत गेला की सुमारे दोन ते तीन तास त्याने विषयाला विराम घेतला नाही. इतक्या कालावधीत स्वत:मध्ये दडलेलं चैतन्य, सुप्तगुण, इच्छाशक्ती, महत्त्वाकांक्षा आदी गुणांची त्याने भरभरून मांडणी केली. त्याच्या जीवनातनं हरवलेली चमक पुन्हा त्याच्या डोळ्यात दिसू लागल्यानंतर समुपदेशकांनी त्याला थांबवलं अन् नवी प्रेरणा देत त्याच्या खांद्यावर हात ठेवला.

एखादा क्रिकेटर मैदानापासून काही कारणाने दूर गेला तरीही तो उत्कृष्ट समालोचक बनू शकतो. तसाच एखादा ‘मेन स्ट्रीम स्वीमर’ स्पर्धात्मक पोहण्यापासून दूर गेला तरीही तो उत्कृष्ट प्रशिक्षक किंवा क्रीडा समुपदेशकही बनून अनेकांच्या करिअरला आकार देऊ शकतो. मनाने पंगू बनण्याचं कारण नाही, समुपदेशकांकडून या चर्चेत मिळालेल्या गुरूमंत्रावर श्रीकांतनं काम करण्यास लगेच सुरुवात केली. वर्षभरानंतर त्याला पुन्हा सूर गवसलेला. अभ्यासातल्या गुणांमध्ये टक्क्यांची नव्वदी गाठणारा श्रीकांत आता शंभर टक्के नवे ध्येय गाठण्यासाठी पंखात नवी उमेद भरू पाहतो आहे. तुमच्यात जे चांगलं आहे, त्याला खतपाणी घालून फुलवा आणि स्वत: मोठे होताना इतरांच्याही उपयोगी तुमचं आयुष्य पडू द्या, असाच संदेश श्रीकांतच्या समुपदेशकांनी या ‘केस स्टडी’निमित्त ‘मटा’कडे मांडला.