३० अधिकारी कर्मचाऱ्यांचा जीव भांड्यात
म. टा. वृत्तसेवा, मनमाड
मनमाड येथील उपजिल्हा रुग्णालयातील करोनाबाधित डॉक्टरांच्या संपर्कातील सर्व वैद्यकीय अधिकारी, परिचारिका व कर्मचारी अशा ३० जणांचा करोना अहवाल निगेटिव्ह आल्याने शहरवासियांचा जीव भांड्यात पडला आहे. या शिवाय दोन अधिकाऱ्यांचे अहवाल देखील निगेटिव्ह आल्याने समाधान व्यक्त होत आहे. दोन दिवसांपूर्वी हे रुग्णालय सील करण्यात आले होते.
मनमाड शहरातील उपजिल्हा रुग्णालयात कोविड केंद्राचे काम बघणारे तसेच रुग्णांचे स्वॅब घेणारे डॉक्टर करोनाबाधित झाल्याने संपूर्ण रुग्णालय कंटेन्मेंट झोनमध्ये येऊन चार दिवस सील करण्यात आले होते. या डॉक्टरांच्या संपर्कातील रुग्णालयाशी संबंधित ३० जणांचे तसेच प्रशासनातील दोन अधिकाऱ्यांचे स्वॅब घेण्यात आले होते. त्यांच्या करोना अहवालाकडे संपूर्ण शहराचे लक्ष लागले होते. दरम्यान सोमवारी रात्री उशिरा आलेल्या अहवालात सर्व करोना निगेटिव्ह असल्याचे स्पष्ट झाल्याने मनमाडकरांनी सुटकेचा नि:श्वास सोडला आहे.
दोन अधिकारीही निगेटिव्ह
गेल्या दीड महिन्यांपासून प्रशासकीय कार्याच्या माध्यमातून करोना लढाईत आघाडीवर असणाऱ्या मुख्याधिकारी डॉ. दिलीप मेनकर व नायब तहसीलदार योगेश जमदाडे यांचेही स्वॅब पाठवण्यात आले होते. त्यांचा अहवालही निगेटिव्ह आल्याने शहरात समाधान व आनंद व्यक्त होत आहे. शहर व नांदगाव तालुका लवकरच करोना मुक्त व्हावा, अशी अपेक्षा व्यक्त होत आहे.