म. टा. प्रतिनिधी, नाशिक
जिल्हा परिषदेअंतर्गत प्राथमिक शिक्षक, पदवीधर शिक्षक, मुख्याध्यापकांची ऑनलाइन पद्धतीने बदलीची प्रक्रिया नुकतीच पार पडली. या प्रक्रियेत ज्या शिक्षकांनी विशेष संवर्ग १ व २ मध्ये खोटी अथवा चुकीची माहिती भरली, तसेच इच्छित स्थळी बदली करवून घेतली अथवा ज्यांनी बदलीतून सूट घेतली आहे अशा शिक्षकांची जिल्हा परिषदेचे मुख्य कार्यकारी अधिकारी डॉ. नरेश गिते यांनी सुनावणी घेतली. मागील आठवड्यात काही तालुक्यांतील शिक्षकांची सुनावणी घेण्यात मुख्य कार्यकारी अधिकारी यांच्यातर्फे घेण्यात आली होती. मात्र, शासकीय सुटी व समन्वय सभा यामुळे उर्वरित तालुक्यांच्या शिक्षकांची सुनावणी बाकी होती. ही सुनावणी मंगळवारी घेण्यात आली. यावेळी शिक्षकांच्या कागदपत्रांची पडताळणी तसेच अंतराबाबत सादर केलेल्या कागदपत्रांची पडताळणी करण्यात आली. नाशिक, निफाड, इगतपुरी व येवला तालुक्यातील शिक्षकांची सुनावणी यावेळी घेण्यात आली. ऑनलाइन बदली प्रक्रियेत भरलेली माहिती व सादर केलेली माहिती खरी असणाऱ्या ८ शिक्षकांचे अभिनंदन करून त्यांची बाजू मान्य करण्यात आली. शिक्षकांची बाजू ऐकण्यासाठी गट शिक्षणाधिकाऱ्यांसह वैद्यकीय अधिकारी, डेप्युटी इंजिनीअरदेखील उपस्थित होते. सामान्य प्रशासन विभागाचे उपमुख्य कार्यकारी अधिकारी प्रदीप चौधरी, प्राथमिक विभागाचे प्रभारी शिक्षणाधिकारी नितीन बच्छाव, उपशिक्षणाधिकारी सोनवणे आदी उपस्थित होते.
शिक्षिकेला चक्कर आणि उपचार
मुख्य कार्यकारी अधिकारी जाब विचारतील याचा धसका घेत एका शिक्षिकेला सुनावणी वेळी चक्कर येत होती. शिक्षकांच्या चक्कर येण्यावर उपचार करण्यासाठी डॉ. गिते यांनी थेट जिल्हा शासकीय रुग्णालयाचे वैद्यकीय पथक जिल्हा परिषदेत बोलावले. तपासणी नंतर मात्र, सदर शिक्षिकेची प्रकृती ठणठणीत असल्याचे निदर्शनास आले. मात्र, तरीही सुनावणी पूर्ण होईपर्यंत वैद्यकीय पथक जिल्हा परिषदेत सज्ज ठेवण्यात आले होते.