रुचकर पदार्थ झटपट बनविण्याच्या टिप्स

म. टा. वृत्तसेवा, इंदिरानगर

विविध प्रकारचे रुचकर खाद्यपदार्थ झटपट कसे बनवावेत, याच्या टिप्स नामांकित शेफ संजीव कपूर यांनी महिलांना दिल्या. महाराष्ट्र टाइम्स कल्चर क्लब व व्हेजिको ट्रीतर्फे संजीव कपूर खजानाच्या वतीने इंदिरानगर येथे झालेल्या कार्यक्रमात महिलांनी ही पर्वणी साधली.

या अनोख्या कार्यक्रमाला महिलावर्गाचा मोठा प्रतिसाद लाभला. विशेष म्हणजे खाद्यपदार्थ शिकविण्याबरोबरच विविध सांस्कृतिक कार्यक्रमांचे आयोजनही यावेळी करण्यात आले होते. सध्या सर्वांनाच दिवाळीचे वेध लागले आहेत. त्यातच महिलावर्गाची दिवाळीतील सर्वांत असणारे फराळाचे पदार्थ बनविण्याची लगबग सुरू झाली आहे. यापार्श्वभूमीवर कमी वेळेत रुचकर खाद्यपदार्थ कसे बनवावेत, हे यावेळी प्रात्यक्षिकांसह दाखविण्यात आले.

या पदार्थांची प्रात्यक्षिके

यावेळी शेफ संजीव कपूर यांनी गुलाबजाम चीज केक, कांचीपूरम इडली, पनीर टिक्‍का, ब्रेड पकोडा, पावभाजी, अपरीकोट आणि चिल्ली मोजिटो, एबीसी ज्युस यांसारखे विविध खाद्यपदार्थ सोप्या व सरळ पद्धतीन झटपट कसे बनवावेत, याबाबत मार्गदर्शन केले. त्याचबरोबर फळांना किंवा भाज्यांना निरनिराळे आकार देऊन आकर्षक कसे बनविता येते, याचेही प्रात्यक्षिक त्यांनी दाखविले. विविध रुचकर खाद्यपदार्थ बनविण्याबरोबरच ते देताना कसे सजावावेत याविषयीदेखील यावेळी मार्गदर्शन करण्यात आले.


हसत-खेळत मार्गदर्शन

विशेष म्हणजे यावेळी शहरातील विविध स्थानिक कलावंतांनी गाणी, झुम्बा डान्सचे सादरीकरण केल्याने हसत-खेळत पदार्थ शिका, असे वातावरण निर्माण झाले होते. या कार्यक्रमामुळे अनेक नवनवीन पदार्थ महिलांना शिकावयास मिळाल्याने महिला व युवतींमध्ये आनंदाचे वातावरण होते.



महिलावर्गाचा उत्स्फूर्त प्रतिसाद

हा कार्यक्रम दुपारी तीन वाजता सुरू होणार असला, तरी एक वाजेपासूनच महिलांची गर्दी झाली होती. महिलांचा उत्साह पाहून शेफ कपूर यांनीही जादा वेळ देऊन अनेक पदार्थ बनवून दाखविले. महाराष्ट्र टाइम्स कल्चर क्लब व व्हेजिको ट्रीतर्फे झालेल्या या कार्यक्रमाचे महिलांनी कौतुक करून असेे कार्यक्रम वेळोवेळी घ्यावेत, असे मत व्य‍क्त केले.