अबब, १८ हजार कोटींची मागणी!

नाशिक : शहराच्या विकासासाठी महापालिका प्रशासननाकडून दोन हजार १७३ कोटींचा विकास आराखडा सादर केला असतांनाही, दत्तक नाशिकच्या विकासासाठी महापौर रंजना भानसी यांनी मुख्यमंत्र्याकडे चक्क १८ हजार कोटींच्या आर्थिक मदतीची मागणी केली आहे. महापौरांच्या या अवाढव्य मागणीमुळे मुख्यमंत्र्यासह सत्ताधारी भाजप पदाधिकारीही भांबावले. या भल्या मोठ्या मागणीमुळे मुख्यमंत्र्यानी आर्थिक मदतीचा हात आखडता घेतल्याची चर्चा महापालिका वर्तुळात आहे.

दत्तक नाशिकच्या विकासासाठी मुख्यमंत्री फडणीस यांनी रविवारी महापालिकेला भेट देत सद्यस्थितीचा आढावा घेतला. नाशिकच्या विकासासाठी पाच वर्षात नियोजनबद्ध आराखडा तयार करण्याचे आदेश दिले. त्यानुसार, प्रशासनाने दोन हजार १७३ कोटींचा कृती आराखडा तयार केला होता. बैठकीत या आराखडा सादरीकरणानंतर महापौर भानसी यांनी मुख्यत्र्यांकडे शहराच्या विकासाठी भरीव अशी १८ हजार कोटी रुपयांची मागणी केली. यात मेट्रो रेल्वेसाठी दहा हजार कोटी, रिंगरोड उड्डाणपूलासाठी एक हजार कोटी, जैवविविधता संर्वधनासाठी पाचशे कोटी, सीसीटीव्ही पाचशे कोटी, मलनिस्सारणसाठी एक हजार कोटी, भूसंपादन कामासाठी एक हजार कोटी, साधुग्राम जागा आरक्षणासाठी अडीच हजार कोटी, विद्युत विभागासाठी एक हजार कोटींची मागणी केली आहे. तसेच जलसंपदाकडून पाणीपट्टीपोटी आकारण्यात येणारे ५२ कोटी माफ करावी, अशी मागणी त्यांनी केली आहे.

महापौरांच्या या भल्या मोठ्या आर्थिक मदतीच्या पत्राकडे पाहिल्यावर मुख्यमंत्र्याचे भुवया उंचावल्या. याउलट मुख्यमंत्र्यानी महापौरांना उपदेशाचे डोस पाजत, लंडनच्या महापौरांचा दाखला देत, स्वतःच्या सोर्सेसमधून शहर विकास करण्याचा सल्ला दिला.