आज निलमणीची निघाणार मिरवणूक
म. टा. वृत्तसेवा, मनमाड
मनमाड ते कुर्ला दरम्यानच्या सर्व प्रवाशांसाठी लाडक्या ठरलेल्या गोदावरी एक्स्प्रेसमधील गणरायाला शनिवारी सायंकाळी मनमाड येथे भावपूर्ण वातावरणात निरोप देण्यात आला. पोलिस उप-अधीक्षक आर. रागसुधा यांच्या हस्ते आरती करण्यात आली. त्यानंतर 'गोदावरी राजा'ला रेल्वे स्थानकासमोर ढोल ताशांच्या गजरात निरोप देण्यात आला.
'गणपती बाप्पा मोरया'च्या जयजयकाराने रेल्वे स्थानक परिसर दुमदुमला होता. गोदावरी राजाच्या मिरवणुकीत विविध पथकांच्या प्रात्यक्षिकांनी मनमाडकरांचे लक्ष वेधले. यासह दिंडोरी, नाशिक येथील ढोलपथक हे या मिरवणुकीचे खास आकर्षण ठरले. मिरवणुकीत सामाजिक, शैक्षणिक, राजकीय क्षेत्रातील मान्यवर तसेच चाकरमाने, प्रवासी मोठ्या संख्येने सहभागी झाले होते. गोदावरी राजा मंडळाचे अध्यक्ष नरेंद्र खैरे यांनी उपस्थितांचे स्वागत व सत्कार केला. रेल्वे प्रवासातील अडचणी दूर कर, रेल्वे प्रवास सुरक्षित व सुखकर राहू दे, प्रवाशांच्या सुरक्षिततेचे रेल्वेत उपाय करण्याचे रेल्वे व पोलिस प्रशासनाला सुचू दे, अशाच मागण्या जणू रेल्वे प्रवासी व चाकरमाने
गणरायाकडे करीत होते.
विसर्जनासाठी प्रशासन सज्ज
मनमाड शहरात दत्त मंदिर मार्गावरील गणेश कुंड येथे घरगुती व मंडळांच्या गणेशाचे विसर्जन करण्यात येणार आहे. गणेश कुंडात पाणी सोडण्यात आले असून, विसर्जन व्यवस्थित व्हावे यासाठी पालिकेने अधिकारी व कर्मचाऱ्यांची विविध पथके तैनात केली आहेत. रविवारी सकाळी निलमणी गणेशाची पुणेरी थाटात पालखीतून मिरवणूक निघणार असून, नेहमीप्रमाणे ही मिरवणूक वैशिष्ट्यपूर्ण ठरेल असे मंडळाचे अध्यक्ष नितीन पांडे यांनी सांगितले.