म. टा. खास प्रतिनिधी, नाशिक
धडक देऊन दुचाकीस्वाराला जखमी केल्याप्रकरणी आरोपी मिनी बसचालकाला चार हजार रुपये दंड तसेच दंड न भरल्यास एका महिन्याच्या कारावासाची शिक्षा ठोठावण्यात आली आहे. मच्छिंद्र देवबा शेलार (रा. सिंहस्थनगर, सिडको) असे आरोपीचे नाव आहे.
शिवाजी मंगळू बेंडकुळे (रा. दहेगाव, ता. जि. नाशिक) हे २९ जून २०१२ रोजी रात्री आठच्या सुमारास दुचाकीवरून अंबड लिंकरोडने चालले होते. एक्स्लो पॉईंट येथे मिनी बसचालक शेलार याने बेंडकुळे यांच्या दुचाकीला धडक दिली. त्यात १५ हजार रुपयांचे नुकसान झाले. अंबड पोलिसांनी या प्रकरणी गुन्हा दाखल केला होता. हवालदार टी. पी. उखाडे यांनी गुन्ह्याचा तपास करीत दोषारोपपत्र प्रथम वर्ग न्यायदंडाधिकाऱ्यांकडे सादर केले. अतिरिक्त मुख्य न्यायदंडाधिकारी बी. के. गवांडे यांच्यासमोर खटल्याचे कामकाज चालले. सरकारी पक्षातर्फे अॅड. विद्या देवरे यांनी काम पाहिले. पुरावे सिद्ध झाल्याने न्यायालयाने आरोपी शेलार यास चार हजार रुपये दंड; दंड न भरल्यास एका महिन्याच्या करावासाची शिक्षा ठोठावली. हवालदार एस. एम. देशमुख, महिला पोलिस आर. एस. उगले यांनी या प्रकरणात पाठपुरावा केला.