रस्त्याच्या कामाची फाइल गहाळ
अधिकाऱ्यांची माहिती; नगरसेवकांचे आयुक्तांना पत्र
म. टा. वृत्तसेवा, सिडको
सिडकोतील अत्यंत रहदारीचा आणि अंबड औद्योगिक वसाहतीला जोडला जाणारा त्रिमूर्ती चौक ते माऊली लॉन्सपर्यंतचा रस्ता तयार करण्याची फाइल चक्क गहाळ झाल्याचे अधिकाऱ्यांनी सांगितले.
एकीकडे 'स्मार्ट' होण्याकरीता शहराची वाटचाल सुरू असून, दुसरीकडे विकासकामांचीच फाइल गहाळ होण्याचा प्रकार समोर येत असल्याने महापालिकेत नेमके काय चालले, हा प्रश्न सामान्य नागरिकांना पडला आहे.
गत दोन वर्षांपासून ही रस्ता रुंदीकरणासंदर्भातील फाइल मंजूर होत नसल्याने याबाबत नगरसेवक शामकुमार साबळे यांनी महापालिका आयुक्तांना पत्र दिले आहे. तसेच महासभेपर्यंत या रस्ताचे काम सुरू न झाल्यास तीव्र आंदोलन करण्याचा इशाराही त्यांनी दिला आहे. नाशिक शहराचा स्मार्ट सिटीमध्ये समावेश झालेला असल्याने नाशिकमधील सर्वच रस्ते आणि विविध सोयी मिळतील असे वाटले होते. मात्र, सिडको परिसरातील अत्यंत वर्दळीचा आणि नाशिक शहर आणि अंबड औद्योगिक वसाहतीला जोडणाऱ्या रस्त्याच्या फाइलचा मागील दोन वर्षांपासून केवळ प्रवासच सुरू आहे. त्रिमूर्ती चौक ते माऊली लॉन्सपर्यंतच्या रस्त्याचे रुंदीकरण करण्याबाबत फेब्रुवारी २०१८ मध्ये पत्र दिले होते. रस्ता ३० मीटर रुंदीचा असून, सध्या या रस्त्यावरील वाहतूक पाहता रस्ता रुंदीकरण होणे आवश्यक आहे. तसेच या रस्त्यावर एक कॉलेज, दोन शाळा, चार रुग्णालये आहेत.
रस्ता रुंदीकरण गरजेचे
अंबड औद्योगिक वसाहतीला जोडणारा हा मुख्य रस्ता असल्याने या रस्त्यावर कायमच वर्दळ असल्याचे दिसून येत असते. या रस्त्याची रुंदी करण्याबाबत वारंवार पत्रव्यवहार करूनही काम होत नसल्याने नगरसेवक साबळे यांनी या फाइलची चौकशी केली असता ही फाइलच गहाळ झाली असल्याचे अधिकाऱ्यांनी सांगितले होते. या रस्त्याचे रुंदीकरण होणे अत्यंत गरजेच्या असताना प्रशासन याकडे दुर्लक्ष करीत असल्याने आता थेट याबाबत महासभेत आंदोलन करण्याचा निर्णय नगरसेवक साबळे यांनी घेतला आहे. विशेष म्हणजे, स्मार्ट सिटीच्या नावाखाली अधिकारी उपनगराच्या विकासाकडे लक्ष देत नसल्याचे यावरून दिसून येत आहे.
मागील दोन वर्षांपासून रस्ता रुंदीकरणाची फाइल तयार करण्यात आली आहे. वारंवार पाठपुरावा करूनही कोणती कारवाई प्रशासनाकडून होत नाही. आता तर ही फाइल गहाळ झाले असल्याचे अधिकाऱ्यांनी सांगितल्याने नाईलाजाने आंदोलनाचा पवित्रा घ्यावा लागणार आहे.
- शामकुमार साबळे, नगरसेवक