म. टा. प्रतिनिधी, नाशिक
लोकसभा निवडणुकीसाठीची मतमोजणी येत्या २३ मे रोजी होणार असून, मतमोजणी केंद्राच्या ठिकाणी मोबाइलला बंदी करण्यात आली आहे. सुरक्षेच्या कारणास्तव हा निर्णय घेतल्याचे प्रशासनाने जाहीर केले आहे. त्यामुळे राजकीय पक्षांच्या पदाधिकाऱ्यांसह कार्यकर्त्यांना खबरदारी घ्यावी लागणार आहे.
लोकसभा सार्वत्रिक निवडणूक २०१९ अंतर्गत नाशिक व दिंडोरी लोकसभा मतदारसंघासाठी झालेल्या मतदानाची मतमोजणी येत्या २३ मे रोजी अंबड औद्योगिक वसाहतीतील शासकीय गोदामात होणार आहे. मतमोजणी प्रक्रिया सुरळीत पार पाडता यावी आणि कुठल्याही प्रकारे व्यत्यय येऊ नये, यासाठी मतमोजणी केंद्राचे ठिकाणी मतमोजणी कामी नियुक्त अधिकारी, कर्मचारी, उमेदवार व प्रतिनिधी यांना मोबाइल व कुठलेही इलेक्ट्रॉनिक यंत्र वापरण्यास निवडणूक आयोगाने मनाई केलेली आहे. मतमोजणी केंद्रामध्ये मोबाइल वा इतर कुठल्याही इलेक्ट्रॉनिक यंत्राचा वापर झाल्यास संबंधितांविरुद्ध कायदेशीर कारवाई करण्यात येईल, असा इशारा प्रशासनाने दिला आहे.
मतमोजणीनुसार फेरीनिहाय निकाल घोषित करण्यासाठी मतमोजणी परिसराचे ठिकाणी लाऊडस्पीकरची पुरेशी व्यवस्था करण्यात आलेली आहे. यासाठी मतमोजणी केंद्राचे ठिकाणी मोबाइल व इलेक्ट्रॉनिक यंत्राचा वापर अधिकारी/कर्मचारी, उमेदवार व त्यांचे प्रतिनिधी यांनी टाळावा, असे आवाहन जिल्हाधिकारी तथा जिल्हा निवडणूक निर्णय अधिकारी सूरज मांढरे व निलेश सागर यांनी केले आहे. या निर्णयामुळे राजकीय पक्षाचे पदाधिकारी आणि कार्यकर्ते यांना मोबाइल बाळगता येणार नाही. निकालाची कितीही उत्सुकता असली तरी या सर्वांना क्षणाक्षणीचे अपडेटस मोबाइलद्वारे इतरांनाही देता येणार नाहीत. मोबाइल बंदीच्या निर्णयाची कठोर अंमलबजावणी करण्यात येणार असून, यावेळी अंतिम निकाल घोषित होण्यास वेळ लागणार आहे. त्यामुळे राजकीय पक्षाच्या पदाधिकारी व कार्यकर्त्यांच्या उत्साहावर विरजण आले आहे.