म. टा. प्रतिनिधी, नाशिक
मागील भांडणाची कुरापत काढून एकाने महिलेस जातीवाचक शिवीगाळ करीत तिचा विनयभंग केला. या प्रकरणी अंबड पोलिसांनी अॅट्रोसिटीचा गुन्हा दाखल करीत संशयितास अटक केली.
विजय दिनकर पाटील (४३, रा. सिटू भवनमागे, खुटवडनगर) असे पोलिसांनी अटक केलेल्या संशयिताचे नाव आहे. पीडित महिलेच्या तक्रारीनुसार, ती संशयित आरोपीकडे भाडेकरू म्हणून राहते. संशयित आरोपीने शनिवारी (दि. १५) रात्री आठ वाजेच्या सुमारास महिलेच्या खोलीत प्रवेश केला. विना परवानगी घरात प्रवेश केल्याबाबत महिलेने संशयितास जाब विचारला असता संशयिताने तिला शिवीगाळ सुरू केली. यावेळी संशयिताने महिलेच्या आई व मुलाच्या डोळ्यात मिरचीची पूड फेकली. यानंतर त्याने महिलेस जातीवाचक शिवीगाळ करून तिचा विनयभंग केला. या प्रकारानंतर महिलेने थेट पोलिस स्टेशन गाठून फिर्याद दिली. पोलिसांनी अनुसुचित जाती जमाती प्रतिबंधक कायद्यातील तरतुदी आणि विनयभंग, शिवीगाळ आदी कलमानुसार गुन्हा दाखल करीत संशयितास अटक केली. घटनेचा पुढील तपास विभाग तीनचे सहायक पोलिस अरविंद आडके करीत आहेत.
जिममधून महिलेचा मोबाइल लंपास
जिमसाठी आलेल्या महिलेने बँगेत ठेवलेला ५० हजार रुपयांचा मोबाइल आणि एसबीआय बँकेचे क्रेडिट कार्ड चोरट्यांनी काढून घेतले. हा प्रकार इंदिरनगर परिसरातील बापू बंगल्याजवळील एच फिटनेस या जिममध्ये घडला असून, या प्रकरणी आलिशा विजय पानसरे (२८, रा. बी ४, वेदास स्पेसस, गोविंदनगर) यांनी फिर्याद दिली आहे. पानसरे शनिवारी (दि. १५) सकाळच्या सुमारास जिममध्ये गेल्या होत्या. यावेळी त्यांनी आपला मोबाइल व क्रेडिट कार्ड एका बँगेत काढून ठेवले. व्यायाम आटोपून परत आल्यानंतर बँगेत मोबाइल आणि कार्ड नसल्याचे त्यांच्या लक्षात आले. या प्रकरणी इंदिरनगर पोलिसांनी चोरीचा गुन्हा दाखल केला असून, अधिक तपास हवालदार आर. के. शेख करीत आहेत.
..
कट मारल्याच्या वादातून हल्ला
कट मारल्याच्या वादातून चौघांनी मिळून एकास बेदम मारहाण केली. ही घटना शनिवारी (दि. १५) रात्री साडेआठ वाजेच्या सुमारास देवळालीगावातील दक्षिण हनुमान मंदिराजवळ घडली. या प्रकरणी हरिओम चंद्रकांत पवार (१७, रा. तेलीगल्ली, देवळालीगाव) याने फिर्याद दिली आहे. पवारच्या फिर्यादीनुसार, रात्रीच्या सुमारास तो हनुमान मंदिर येथे आरती करीत असताना संशयित आरोपी कार्तिक भडांगे, सागर मोरे, सुशांत भालेराव आणि कार्तिकचा मोठा भाऊ असे चौघे तिथे आले. त्यांनी दुपारच्या सुमारास दुचाकीस कट मारल्याचा राग मनात धरून थेट लाकडी दांड्याने तसेच हाताबुक्क्यांनी मारहाण करण्यास सुरुवात केली. यात जखमी झालेल्या पवारला बिटको हॉस्पिटलमध्ये दाखल करण्यात आले असून, त्याच्यावर उपचार सुरू आहेत. या प्रकरणी उपनगर पोलिसांनी गुन्हा दाखल केला असून, अधिक तपास सहायक पोलिस उपनिरीक्षक काकड करीत आहेत.
....
जुगार खेळणाऱ्या १५ जणांना अटक
भद्रकाली आणि मुंबई नाका पोलिस स्टेशन हद्दीत पोलिसांनी कारवाई करीत जुगार खेळणाऱ्या १५ जणांची धरपकड केली. या सर्वांवर संबंधित पोलिस स्टेशनमध्ये गुन्हा दाखल करण्यात आला.
भद्रकाली पोलिसांनी शनिवारी मध्यरात्री १ वाजेच्या सुमारास काजीपुरातील विठ्ठल मंदिराजवळ असलेल्या शिवक्रांती सांस्कृतिक गणेश मंडळांच्या मागे मोकळ्या जागेत सुरू असलेल्या जुगार अड्ड्यावर छापा मारला. यावेळी आठ संशयित जुगार खेळताना सापडले. पोलिसांनी त्यांच्याकडून जुगाराचे साहित्य आणि रोकड हस्तगत केली. संशयितांमध्ये हिरामण काश्मिरे (५८, रा. मानेकशानगर, द्वारका), कांतीलाल बिरार (५२, रा. गडकरी चौक), पंकज काळे (४२, रा. बनकर मळा), संजय अवसरकर (४८, रा. जुने नाशिक), जहिर शेख (३९, रा. चौकमंडई), विनायक करंजकर (३४, रा. मधली होळी, जुने नाशिक), गणेश तोरे (३१, भाभानगर) आणि ऋषिकेश काळे (२१, काजीपुरा) यांचा समावेश होता. या प्रकरणी पोलिस कॉन्स्टेबल उत्तम पाटील यांनी दिलेल्या फिर्यादीवरून भद्रकाली पोलिस स्टेशनमध्ये गुन्हा दाखल करण्यात आला. घटनेचा पुढील तपास हवालदार सातपुते करीत आहेत.
दरम्यान, अशाच प्रकारची कारवाई मुंबई नाका पोलिस स्टेशनच्या पथकाने केली. पोलिस पथकाने शुक्रवारी (दि.१४) रात्री १० वाजेच्या सुमारास गोविंदनगर परिसरातील नासर्डी नदीजवळील भावसागर भवनच्या पाठीमागे असलेल्या चौक क्रमांक सात येथे छापा मारला. यावेळी लक्ष्मण दावाड (३६), शरद पागे (२३), उमेश गायकवाड (१९), सागर भांगरे (२०), योगेश कडाळे (२२), दिपील भांगरे (२२), सिद्धार्थ हे संशयित युवक जुगार खेळताना सापडले. त्यांच्या ताब्यातून रोकड आणि पत्ते हस्तगत करण्यात आले. या प्रकरणी पोलिस शिपाई राजेंद्र उगले यांनी दिलेल्या फिर्यादीनुसार जुगार अधिनियमानुसार गुन्हा दाखल करण्यात आला. घटनेचा पुढील तपास हवालदार एस. पी. क्षिरसागर करीत आहेत.
लोगो : क्राइम डायरी