मालेगाव तालुक्यातील दुर्दैवी घटना
...
म. टा. वृत्तसेवा, मालेगाव
वडिलांचे निधन झाल्याचा निरोप मुलाला मिळाला. वडील गेल्याचे दु:ख मनात घेऊन तो अखेरच्या दर्शनासाठी गावाकडे निघाला. पितृछत्र हरपल्याने घरात एकच टाहो फुटला होता. त्याने वडिलांचे अंत्यदर्शन घेतले. त्याच्या हातानेच वडिलांना अग्निडाग दिला जाणार तोच त्याला हृदयविकाराचा झटका आला आणि त्यातच त्याचा मृत्यू झाला. अत्यंत हृदयद्रावक अशी घटना घडली ती खडकी (ता. मालेगाव) या गावी. वडिलांच्या अंत्यसंस्कारासाठी आलेल्या तरुण मुलाचेदेखील अंत्यसंस्कार करण्याची वेळ त्या कुटुंबावर आल्याने खडकीसह संपूर्ण पंचक्रोशीत शोककळा पसरली आहे.
खडकी गावातील प्रगतिशील शेतकरी कारभारी संपत बागूल (वय ८५) यांचे सोमवारी (दि. १) वृद्धापकाळाने निधन झाले. कारभारी बागूल यांच्या कुटुंबात तीन मुले, सुना, नातवंडे असा परिवार. त्यांचा सर्वात लहान मुलगा सर्जेराव बागूल (वय ४०) हे नाशिक येथील एका कंपनीत अभियंता म्हणून कार्यरत होते. ग्रामस्थांनी वडील गेल्याचे कळवताच ते पत्नी व दोन चिमुरड्यासह वडिलांच्या अंत्यदर्शनासाठी खडकीला आले. वडिलांना आता सर्जेराव यांच्या हातानेच अग्निडाग दिला जाणार होता. मात्र नियतीच्या मनात काही वेगळेच असावे. सर्जेराव वडिलांचे दर्शन घेऊन बाहेर पडताच, त्यांना हृदयविकाराचा झटका आला. वडिलांच्या जाण्याने शोकसागरात बुडालेल्या बागूल कुटुंबावर काळाने घाला घातला. घटनास्थळी असलेले बाजार समिती उपसभापती सुनील देवरे व ग्रामस्थांनी सर्जेराव यांना पुढील उपचारासाठी मालेगावातील खासगी रुग्णालयात आणले खरे, परंतु तोपर्यंत त्यांची प्राणज्योत मालवली होती. हृदय पिळवटून टाकावे, अशी ही दुर्दैवी घटना. बागूल कुटुंबासह पंचक्रोशी नियतीच्या या क्रूर डावाने हादरली. हृदयावर दगड ठेवत बागूल कुटुंबासह ग्रामस्थांनी आधी वडिलांचे व नंतर मुलाचे अत्यंसंस्कार पार पाडले. पितृछत्र हरवल्याच्या दु:खातून सावरावे तोच घरातला तरुण मुलगा केल्याने बागूल कुटुंब नि:शब्द झाले आहे.