म. टा. खास प्रतिनिधी, नाशिक
तोट्यात असलेल्या राज्य परिवहन महामंडळाने प्रवाशांना आपल्याकडे आकर्षित करण्यासाठी शिवशाही बससेवा सुरू करण्याची घोषण केली होती. त्यानंतर नाशिकमध्ये प्रायोगिक तत्त्वावर यातील दोन वातानुकूलित बस मे मध्ये सुरू होण्याची शक्यता आहे. त्यासाठी एसटी महामंडळाने हालचाली सुरू केल्या असून, या बसला प्रतिसाद कसा मिळतो यावरुन पुढील नियोजन केले जाणार आहे.
शिवशाही बस गाडीच्या प्रति टप्प्याचे भाडे इतर बस गाड्यांच्या तुलनेत कमी ठेवण्याचा निर्णय महामंडळाने घेतला आहे. वातानुकूलित शिवशाही बस गाडीचे प्रति टप्प्याचे भाडेही कमी ठेवण्याचा निर्णय याअगोदरच झाला आहे. त्यामुळे भाडेतत्वावर घेण्यात येणाऱ्या या बसला कसा प्रतिसाद मिळतो हे पहाणे महत्त्वाचे असणार आहे. या दोन बस सुरू झाल्यानंतर तीन महिने सर्व्हे केला जाणार असून, त्यानंतर पुढील टप्पा ठरवण्यिात येणार मंडळातर्फे सांगण्यात आले.
खासगी वाहतुकदार आरामदायी बस गाड्यांच्या भाड्यात सवलत देतात. त्यामुळे एसटीच्या प्रवासी संख्येत घट होत असल्यामुळे एसटीने या शिवशाही बस सुरू करण्याचा निर्णय घेतला आहे. तब्बल ५०० बस या राज्यभर टप्याटप्याने सुरु केल्या जाणार आहेत. राज्यातील विविध शहरांसाठी शिवशाही बस सेवा सुरू झाल्यानंतर खासगी बस गाड्यांचे प्रवासी एसटीच्या शिवशाही वळतील अशी मंडळाला आशा आहे.
एसटीने याअगोदरही शिवनेरी बससेवा सुरू केली होती. त्यानंतर शिवशाही बससेवा सुरू केली जाणार आहे. शिवनेरीपेक्षा या बससेवेचे दर कमी असणार असल्याचे बोलले जात आहे. या बससेवेला प्रतिसाद मिळाला तर नाशिक-पुणे ही बससेवा सुरू होणार असल्याचे मंडळातर्फे सांगण्यात आले.