म. टा. खास प्रतिनिधी, नाशिक
करोना संसर्गाच्या पार्श्वभूमीवर महापालिकेच्या बजेटची महासभा आज, शुक्रवारी (दि. २९) प्रथमच ऑनलाइन होत आहे.
आगामी बजेट आणि मागील तहकूब महासभांचे कामकाज त्यात होणार असले, तरी त्यापेक्षा अधिक उत्सुकता हे ऑनलाइन कामकाज कसे चालते याबाबत दिसून येत आहे. सकाळी साडेअकरा वाजता व्हिडीओ कॉन्फरन्सद्वारे महासभा होईल. आयुक्तांच्या दालनाशेजारील कार्यालयात आयुक्तांसह महापौर, उपमहापौर व्हिडीओ कॉन्फरन्सद्वारे सभा घेतील. गटनेत्यांसह महापौर, उपमहापौर, स्थायी समितीच्या कार्यालयामध्ये सदस्यांना बसण्याची सोय करण्यात आली आहे. त्याशिवाय प्रत्येक सदस्याला अॅप्लिकेकशनसह लिंक देण्यात आली असून, त्याद्वारे घरातूनदेखील ऑनलाइन महासभेत सहभागी होता येणार आहे. दरम्यान, राष्ट्रवादी आणि अपक्ष गटनेत्यांने मात्र या प्रक्रियेच्या वैधतेविषयी शंका उपस्थित केली आहे. स्थायी समितीने महासभेला सादर केलेल्या सन २०२०-२१ या आर्थिक वर्षाच्या २३९० कोटींच्या बजेटला या महासभेत मंजुरी दिली जाणार आहे.