म. टा. खास प्रतिनिधी, नाशिक
पती-पत्नी म्हणून एकत्र राहणाऱ्या जोडप्यात अनैतिक संबंधावरून झालेल्या भांडणात संशयित आरोपीने केलेल्या मारहाणीत साडेसतरा वर्षाच्या युवतीचा मृत्यू झाला. ही घटना शुक्रवारी संध्याकाळच्या सुमारास भद्रकाली परिसरातील मांतगवाडा येथे घडली. पोलिसांनी संशयितास लागलीच अटक केली.
गायत्री दिलीप थाटसिंगार (१७, रा. तपोवन) असे हत्या झालेल्या युवतीचे नाव आहे. तर हत्येप्रकरणी पोलिसांनी दिलीप थाटसिंगार (२१, मातंगवाडा) यास अटक केली. या प्रकरणी पोलिसांनी दिलेल्या माहितीनुसार हे दोघे मागील तीन महिन्यांपासून मांतगवाडा येथे पती पत्नी म्हणून एकत्र राहत होते. शुक्रवारी (दि. २) संध्याकाळी साडेसात वाजेच्या सुमारास दोघांमध्ये वाद झाले. यावेळी संशयित दिलीपने गायत्रीला जबर मारहाण केली. यामुळे बेशुद्ध झालेल्या गायत्रीला नागरिकांनी लागलीच सिव्हिल हॉस्पिटलमध्ये दाखल केले. गायत्रीच्या डोक्याला, डोळ्याला अनेक गंभीर जखमा झाल्या होत्या. हॉस्पिटलमध्ये उपचार सुरू असताना तिचा मृत्यू झाला. या घटनेची माहिती मिळताच भद्रकाली पोलिसांनी तातडीने संशयित दिलीपला अटक केली. या गुन्ह्याबाबत बोलताना वरिष्ठ पोलिस निरीक्षक मंगलसिंग सूर्यवंशी यांनी सांगितले की, संशयित आरोपी आणि अल्पवयीन मुलगी एकत्र राहत होते. दोघांच्या नातेवाइकांनी त्यांचे लग्न झालेले नाही, असे सांगितले. गायत्री येत्या सोमवारी अन्य एका मुलाबरोबर निघून जाणार असल्याची माहिती दिलीपला समजली होती. त्याचा राग आल्याने शुक्रवारी संध्याकाळी दोघांमध्ये वाद झाला. त्यातून दिलीपने गायत्रीला बेदम मारहाण केली. अनैतिक संबंधातून हा सगळा प्रकार घडला असून, संशयित आरोपीस अटक करण्यात आली असल्याचे पीआय सूर्यवंशी यांनी स्पष्ट केले.