म. टा. वृत्तसेवा, पंचवटी
सद्गुरू झेंडूजी महाराज बेळीकर दिंडी परंपरेनुसार पंचवटी लेवा पाटीदार समाज मंडळ व जय श्रीराम मित्रमंडळ यांच्यातर्फे म्हसरूळ येथे श्री संगीतमय श्रीमद् भागवत कथा व अखंड हरिनाम सप्ताह व ग्रंथराज श्री ज्ञानेश्वरी पारायण सोहळा सुरू झाला आहे. या भागवत कथेचे कथन मनोज महाराज ओझरखेडकर हे करीत आहेत.
या सोहळ्याच्या दैनंदिन कार्यक्रमात काकड आरती, प्रार्थना, पसायदान, विष्णुसहस्त्रनाम पाठ, ग्रंथराज श्री ज्ञानेश्वरी पारायण, हरिपाठ हे कार्यक्रम होत आहेत. या सोहळ्याचा शुभारंभ दीपप्रज्वलन, कलशपूजन, श्रीहनुमंत पूजन, टाळ-वीणा, मृदुंग, ग्रंथ व संतपूजन आणि पंचपदी हे कार्यक्रमांनी करण्यात आला. भागवत कथेत भागवत महात्म्य, परीक्षिताचा जन्म, सतीचा देहत्याग, भक्त प्रल्हाद सोहळा, श्रीकृष्ण जन्म, श्रीकृष्ण-रुख्मिणी विवाह, सुदामा-श्रीकृष्ण भेट, परीक्षित मोक्ष आदी विषयांचा समावेश राहणार आहे. या सोहळ्याचा समारोप रविवारी (दि. २९) सकाळी ७ ला दिंडी सोहळ्याने होईल. भगवान श्रीकुंडलेश्वर देवस्थानचे भरत महाराज पाटील यांचे काल्याचे कीर्तन होईल. त्यानंतर गीतानगर, दिंडोरी रोड येथे महाप्रसादाचा कार्यक्रम होईल.