मविप्रसाठी निफाडमध्ये चुरस

म. टा. वृत्तसेवा, पिंपळगाव बसवंत

मराठा विद्या प्रसारक संस्थेच्या निवडणुकीचा बिगुल वाजला असून, या संस्थेवर सत्ता स्थापन करण्यासाठी दोन प्रमुख गटांसह अनेक मान्यवर सज्ज झाले आहेत. पाच पदाधिकारी तेरा तालुका संचालक आणि तीन सेवक संचालक अशा एकवीस जागांसाठी १३ ऑगस्ट रोजी मतदान होत आहे.

मविप्रच्या सत्तेचा इतिहास बघितला तर प्रदीर्घ काळ या संस्थेवर निफाड तालुक्याचा अंमल राहिला आहे. साधारण दहा हजार सभासदांपैकी किमान तीन हजार सभासद हे निफाडचे आहेत. त्यामुळे साहजिकच प्रमुख पदांवर निफाडची दावेदारी असते. त्यामुळे यंदाही निफाड तालुक्यात चुरस दिसणार आहे. विद्यमान सरचिटणीस नील‌िमा पवार या अर्थातच पुन्हा सरचिटणीस पदाच्या उमेदवार असतील. तर मागील निवडणुकीत त्यांचे प्रतिस्पर्धी आणि विरोधी गटाचे प्रमुख असलेले माणिकराव बोरस्ते यांनी पवारांबरोबर तडजोड केल्यामुळे ते आता सत्ताधारी गटातून अध्यक्ष किंवा सभापती पदाचे उमेदवार असतील. या शिवाय पवार गटाकडून उमेदवारी मिळविण्यासाठी निफाड तालुक्यातील अनेक मान्यवर प्रयत्नशील आहेत. त्यात माजी चिटणीस प्रतापराव मोरे, माजी संचालक विश्वासराव मोरे, माजी अध्यक्ष अरविंद कारे, प्रतापराव मोगल, पिंपळगावचे उपसरपंच संजय मोरे यांची नावे चर्चेत आहेत. विरोधी गटातर्फे अॅड. नितीन ठाकरे यांनी नील‌िमा पवार यांच्या विरोधात सरचिटणीस पदाची उमेदवारी जाहीर केली आहे. विद्यमान अध्यक्ष प्रतापदादा सोनवणे हे विरोधी गटाकडून पुन्हा एकदा अध्यक्षपदाचे उमेदवार असतील, हे जवळजवळ निश्चित मानले जात आहे. त्यामुळे विरोधी गटाकडून निफाडसाठी दोन पदाधिकाऱ्यांना उमेदवारी मिळण्याची शक्यता आहे. विरोधी ठाकरे, सोनवणे गटाकडून विद्यमान संचालक दिलीप मोरे, नानासाहेब बोरस्ते, डी. बी. मोगल, बाळासाहेब कोल्हे यांची नावे चर्चेत आहेत. निफाडमधील मतदार संख्या आणि सत्ताधारी गटातील पवार व बोरस्ते यांची प्रमुख उमेदवारी लक्षात घेऊन विरोधी गटाकडून निफाडसाठी सभापती आणि चिटणिस पदासाठी उमेदवारी मिळू शकते.