(फोटो आहे)
नारायणराव पवार यांचे निधन
म. टा. प्रतिनिधी, नाशिक
मराठा विद्या प्रसारक समाज संस्थेचे आदर्श मुख्याध्यापक नारायणराव (दादा) कृष्णाजी पवार (वय ९१) यांचे गुरुवारी सकाळी वृद्धापकाळाने निधन झाले. नाशिक अमरधाममध्ये त्यांच्या पार्थिवावर गुरुवारी सायंकाळी अंत्यसंस्कार करण्यात आले. त्यांच्या पश्चात मुलगा, दोन मुली, सून, नातवंडे असा परिवार आहे. महाराष्ट्र नवनिर्माण सेनेचे नेते तथा स्त्रीरोगतज्ज्ञ डॉ. प्रदीप पवार यांचे ते वडील होत.
मूळचे मानूर (ता. कळवण) येथील असलेले नारायणराव पवार आणि त्यांचे कुटुंब नाशिकमध्ये स्थायिक झाले. ते 'दादा' म्हणून परिचित होते. मागील काही दिवसांपासून नारायणराव आजारी होते. दुपारच्या सुमारास त्यांचे पार्थिव मुरुकुटे कॉलनी येथील निवासस्थानी अंत्यदर्शनासाठी ठेवण्यात आले होते. त्यांनी मुख्याध्यापक म्हणून सटाणा, नामपूर, दिंडोरी, नाशिक येथे सेवा बजावली. शिस्तप्रिय शिक्षक म्हणून ते लोकप्रिय होते. मविप्रच्या नाशिक कार्यालयाचे शिक्षणाधिकारी म्हणूनही त्यांनी काम पाहिले होते. स्त्रीरोगतज्ज्ञ डॉ. अमृतराव पवार, डॉ. अभिमन्यू पवार यांचे ते बंधू, तर कळवण वकील संघाचे अध्यक्ष अॅड. संजय पवार आणि समीर पवार यांचे ते चुलते होत.