म. टा. खास प्रतिनिधी, नाशिक
दीड वर्षानंतर नाशिकहून दिल्लीसाठी पुन्हा विमानसेवा सुरू झाली असून, पहिल्याच दिवशी या सेवेला जोरदार प्रतिसाद मिळाला. पहिल्या विमानातून दिल्लीहून ८९ प्रवासी नाशिकला आले, तर नाशिकहून दिल्लीकडे ९२ प्रवाशांनी भरारी घेतली.
केंद्र सरकारच्या उडान योजनेंतर्गत दीड वर्षापूर्वी जेट एअरवेजतर्फे नाशिक-दिल्ली विमानसेवा सुरू होती. या सेवेला प्रतिसादही चांगला होता. मात्र, जेट एअरवेज डबघाईस आल्याने नाशिकची विमानसेवाही बंद पडली होती. त्यानंतर नाशिकहून दिल्लीसाठी स्लॉट मिळावा, यासाठी काही खासगी विमान कंपन्या प्रयत्न करीत होत्या. त्यात स्पाइसजेटने बाजी मारत बुधवारपासून सेवा सुरू केली. दिल्लीहून ३.२० वा. एस ५१४ या १४९ आसनी एअरबसने उड्डाण घेतले. ओझर विमानतळावर ते ५.०५ वाजता पोहोचले. या विमानातून दिल्लीहून नाशिकला ८९ प्रवासी आले. नाशिकला अर्धा तास थांबा घेतल्यानंतर सॅनिटायजेशनसह सर्व प्रक्रिया पूर्ण करून ५.३५ वाजता ९२ प्रवाशांना घेऊन एस ५१५ या क्रमांकाने हे विमान दिल्लीकडे झेपावले. दिल्लीला ते साडेसातला पोहोचले. दिल्ली-नाशिक प्रवासासाठी ४,०६० रुपये, तर नाशिक-दिल्ली प्रवासासाठी ४,०८७ रुपये तिकीटदर ठेवण्यात आला आहे. मंगळवार, बुधवार, गुरुवार आणि रविवारी ही सेवा सुरू राहणार आहे. रेल्वेने दिल्लीला जाण्यासाठी चोवीस तासांपेक्षा जास्त कालावधी लागतो. मात्र, विमानाने अवघ्या दोन तासांत दिल्ली गाठणे शक्य झाल्यामुळे नाशिककरांना ही सेवा फायदेशीर ठरणार आहे. उद्योजक, व्यापाऱ्यांसह पर्यटकांच्या दृष्टीनेही ही सेवा उपयुक्त ठरणार आहे. स्पाइसजेटच्या हैदराबाद, बेंगळुरू सेवेलाही चांगला प्रतिसाद मिळत असून, बुधवारी ७८ आसनी विमानातून बेंगळुरूला ५० प्रवासी गेले, तर ५२ प्रवासी नाशिकला आले.
नाशिक देशाच्या हवाई नकाशावर
नाशिकमधून देशभरातील प्रमुख शहरांना जोडणारी विमानसेवा सुरू झाल्याने नाशिक आता देशाच्या हवाई नकाशावर आले आहे. ट्रूजेट कंपनीने २७ मेपासून नाशिक-अहमदाबाद विमानसेवा सुरू केली होती. त्यानंतर जूनमध्ये एअर इंडियाची उपकंपनी असलेल्या अलायन्स एअरमार्फत हैदराबाद, अहमदाबाद, कांडला आणि पुण्यासाठी हवाईसेवा सुरू केली होती. त्यानंतर २० नोव्हेंबर रोजी स्पाइसजेटने बेंगळुरू, हैदराबादसाठी विमानसेवा सुरू केली असून, तिलाही चांगला प्रतिसाद मिळत आहे. आता देशाची राजधानीही जोडली गेल्यामुळे नाशिकच्या उद्योग-व्यवसायांसह पर्यटनाला मोठा फायदा होणार आहे.
दीड वर्षानंतर नाशिकहून दिल्लीसाठी पुन्हा विमानसेवा सुरू झाली असून, पहिल्याच दिवशी या सेवेला जोरदार प्रतिसाद मिळाला. पहिल्या विमानातून दिल्लीहून ८९ प्रवासी नाशिकला आले, तर नाशिकहून दिल्लीकडे ९२ प्रवाशांनी भरारी घेतली.
केंद्र सरकारच्या उडान योजनेंतर्गत दीड वर्षापूर्वी जेट एअरवेजतर्फे नाशिक-दिल्ली विमानसेवा सुरू होती. या सेवेला प्रतिसादही चांगला होता. मात्र, जेट एअरवेज डबघाईस आल्याने नाशिकची विमानसेवाही बंद पडली होती. त्यानंतर नाशिकहून दिल्लीसाठी स्लॉट मिळावा, यासाठी काही खासगी विमान कंपन्या प्रयत्न करीत होत्या. त्यात स्पाइसजेटने बाजी मारत बुधवारपासून सेवा सुरू केली. दिल्लीहून ३.२० वा. एस ५१४ या १४९ आसनी एअरबसने उड्डाण घेतले. ओझर विमानतळावर ते ५.०५ वाजता पोहोचले. या विमानातून दिल्लीहून नाशिकला ८९ प्रवासी आले. नाशिकला अर्धा तास थांबा घेतल्यानंतर सॅनिटायजेशनसह सर्व प्रक्रिया पूर्ण करून ५.३५ वाजता ९२ प्रवाशांना घेऊन एस ५१५ या क्रमांकाने हे विमान दिल्लीकडे झेपावले. दिल्लीला ते साडेसातला पोहोचले. दिल्ली-नाशिक प्रवासासाठी ४,०६० रुपये, तर नाशिक-दिल्ली प्रवासासाठी ४,०८७ रुपये तिकीटदर ठेवण्यात आला आहे. मंगळवार, बुधवार, गुरुवार आणि रविवारी ही सेवा सुरू राहणार आहे. रेल्वेने दिल्लीला जाण्यासाठी चोवीस तासांपेक्षा जास्त कालावधी लागतो. मात्र, विमानाने अवघ्या दोन तासांत दिल्ली गाठणे शक्य झाल्यामुळे नाशिककरांना ही सेवा फायदेशीर ठरणार आहे. उद्योजक, व्यापाऱ्यांसह पर्यटकांच्या दृष्टीनेही ही सेवा उपयुक्त ठरणार आहे. स्पाइसजेटच्या हैदराबाद, बेंगळुरू सेवेलाही चांगला प्रतिसाद मिळत असून, बुधवारी ७८ आसनी विमानातून बेंगळुरूला ५० प्रवासी गेले, तर ५२ प्रवासी नाशिकला आले.
नाशिक देशाच्या हवाई नकाशावर
नाशिकमधून देशभरातील प्रमुख शहरांना जोडणारी विमानसेवा सुरू झाल्याने नाशिक आता देशाच्या हवाई नकाशावर आले आहे. ट्रूजेट कंपनीने २७ मेपासून नाशिक-अहमदाबाद विमानसेवा सुरू केली होती. त्यानंतर जूनमध्ये एअर इंडियाची उपकंपनी असलेल्या अलायन्स एअरमार्फत हैदराबाद, अहमदाबाद, कांडला आणि पुण्यासाठी हवाईसेवा सुरू केली होती. त्यानंतर २० नोव्हेंबर रोजी स्पाइसजेटने बेंगळुरू, हैदराबादसाठी विमानसेवा सुरू केली असून, तिलाही चांगला प्रतिसाद मिळत आहे. आता देशाची राजधानीही जोडली गेल्यामुळे नाशिकच्या उद्योग-व्यवसायांसह पर्यटनाला मोठा फायदा होणार आहे.