सचिवांच्या कामकाजावर संचालक संतप्त

म. टा. वृत्तसेवा, पंचवटी

नाशिक कृषी उत्पन्न बाजार समितीच्या सचिवांचा कारभार समाधानकारक नसल्याचे १२ संचालकांचे लेखी पत्र, या पुढील कामकाज पारदर्शी करण्याचा संचालकांचा आग्रह यामुळे बाजार समितीची सभा तहकूब करण्यात आली. संचालकांनी संतप्त होत सचिव अरुण काळे यांच्यावर आरोपांची सरबत्ती केली.

संचालकांच्या तक्रारीचा विचार पुढील सर्वसाधारण सभेत विषय पत्रिकेवर घेण्यात यावा, झालेल्या सभेचे इतिवृत्त सर्व संचालकांना देण्यात यावे याबाबतच पुढील सभेत निर्णय घेण्यात येणार असल्याचे संचालकांनी सांगितले. यापुढील कामकाज पारदर्शी करावे, असा आग्रह संचालकांनी धरला. संचालकांच्या डोळ्यात धूळफेक करून त्यांच्या खोट्या सह्या केल्या जात असल्याने आजपासून सर्व सभांचे इतिवृत्त सर्व संचालकांना देण्याचे सभेत ठरविण्यात आले. तसेच बाजार समितीच्या आवारात जागा नसल्याने नवीन अडतदारांना परवाने देण्यात येणार नसल्याचा निर्णयही घेण्यात आला. बाजार समितीच्या कर्मचाऱ्यांना देण्यात आलेला महागाई भत्ता आणि बोनस हा विषय सर्वसाधारण सभेत नसताना मनमानी पद्धतीने मंजूर करून कर्मचाऱ्यांची रक्कम हडपण्याचा प्रयत्न करण्यात आला.

जुन्याच उपसमित्या बरखास्त कराव्यात. त्यांची नव्याने बांधणी करावी, अशी मागणी संचालकांनी केली. यापुढे बाजार समितीच्या कोणत्याही कामाचा ठेका देताना तो ई टेंडर पद्धतीनेच द्यावा, तसेच या सभेत आलेल्या विषयांना मंजुरी देण्यासाठी पुढील १५ दिवसात पुन्हा सभा बोलवावी असे सांगत ही सभा तहकूब करण्यात आली. प्रभारी सभापती श्याम गावित, शिवाजी चुंभळे, तुकाराम पेखळे, संपत सकाळे, युवराज कोठुळे, प्रभाकर मुळाणे, शंकर धनवटे, विमलबाई जुंद्रे, सचिव अरुण काळे, जिल्हा उपनिबंधक कार्यालय अधिकारी आदी उपस्थित होते.