आयुक्त मुंढे काही आभाळातून पडले नाहीत!

म. टा. वृत्तसेवा, पंचवटी

तपोवनातील जॉगिंग ट्रॅकवर रोज हजारो नागरिक येतात. मात्र, हा भाग या अगोदर कधीच चकाचक करण्यात आला नव्हता. मात्र, महापालिका आयुक्तांच्या वॉक विथ कमिशनर उपक्रमासाठी महापालिकेने हा भाग चकाचक केला. अशी स्वच्छता इतर दिवशी का होत नाही, आयुक्त मुंढे काही आभाळातून पडले नाहीत, असा संताप व्यक्त करीत नगरसेवक मच्छिंद्र सानप यांनी महापालिका अधिकाऱ्यांना मंगळवारी झालेल्या पंचवटी प्रभाग समितीच्या सभेत जाब विचारला.

जगदीश पाटील यांनी पंचवटीला विभागीय अधिकारीच नसल्याची खंत व्यक्त केली. सरिता सोनवणे यांनी प्रभागात तीन-चार दिवसांनी घंटागाडी येत असल्याचे सांगितले. कमलेश बोडके यांनी दिवाळी पूर्वी दरवर्षी होणारी साफसफाई यंदा होत नाही. आठ-आठ दिवस घंटागाडी येत नाही. डेंग्यूची साथी वाढलेली असताना टायर, शहाळी गोळा करण्याचे काम या वेळी झालेली झालेले नाही. त्यासाठी प्रशासनाने नियोजन केले नसल्याचा आरोप केला. कोणार्कनगर परिसरात फवारणी केली जात नाही. ऐन दिवाळीत पथदीप बंद आहेत. कुत्र्यांची वाढलेली संख्या मोठी डोकेदुखी ठरत आहे आदी समस्या मांडण्यात आल्या. डेंग्यू, स्वाइन फ्लूसारख्या आजारांनी थैमान घातले असतानाही पंचवटीमध्ये पेस्ट कंट्रोल नावालाच होत असल्याने नगरसेवकांनी नाराजी व्यक्त करीत या कामाचा ठेका रद्द करावा, असा ठराव करण्याचा निर्णय घेतला.

मॅडम तुम्ही का हसता?

इंदिरा गांधी रुग्णालयात वैद्यकीय अधीक्षक पदावर नव्याने रुजू झालेल्या डॉ. शिल्पा काळे या पंचवटी प्रभाग समितीच्या सभेस पहिल्यांदाच हजर झाल्या होत्या. नगरसेवक इतर अधिकाऱ्यांकडे समस्या मांडत असताना त्यांना हसू येत होते. नगरसेवकांच्या परिचयाच्या नसलेल्या डॉ. काळे यांचे हसू अनेकांना खटकले. त्यांनी थेट त्यांना तुम्ही कोण? सभेत कशा येऊन बसल्या? मॅडम तुम्ही का हसता? कुणाची परवानगी घेतली? अशा प्रकारचे प्रश्न विचारून भंडावून सोडले. तेव्हा त्यांनी मी या अगोदर कधीच सभेला हजर राहिलेले नसल्यामुळे प्रोटोकॉल माहिती नसल्याचे सांगितले. मात्र, याअगोदर नगरसेविकांचे पती, त्यांचे कार्यकर्ते, नातेवाईक सभेत बसत होते, त्यावेळी असा प्रश्न कुणी उपस्थितीत केला नव्हता, अशी चर्चा येथे रंगली होती.